کابل کې پنځه کسان له څه باندې ۲۶۰ کیلوګرام چرسو او ۴ زره زیکپ ګولیو سره نیول شوي

کابل (پژواک، ۲۳ غبرګولی ۱۴۰۳): د کابل امنیه قومانداني وايي چې له نشه‌يي توکو سره د مبارزې پولیسو یو کس له ۲۶۲ کیلوګرام چرسو او څلور نور کسان له څلور زره زیکپ ګولیو سره نیولي دي.

د کابل امنیې قوماندانۍ له خوا نن په خپره شوې یوه خبرپاڼه کې راغلي چې له نشه‌يي توکو سره د مبارزې مدیریت پولیسو په یو لړ عملیاتو کې ۲۶۲ کیلوګرام چرس نیولي دي.

خبرپاڼه کاږي، یاده اندازه چرس چې د یوه کس له خوا په مازدا موټر کې له غزني کابل ته رالېږدول کېدل، ونیول شول.

د خبرپاڼې په حواله، پولیسو دغه راز د کابل ښار  ۱۵مې امنیتي حوزې مربوطاتو کې هم څلور کسان له څلور زره زیکپ ګولیو نیولي دي.

د خبرپاڼې د معلوماتو له مخې چې د نیول شوو کسانو دوسیې اړوندو بنسټونو ته وسپارل شوې دي.