کابل (پژواک، ۲ چنګاښ ۱۴۰۳): د روسيې بهرنيو چارو وزير ویلي چې د ټولیز امنيت تړون سازمان (CSTO) غړي هېوادونه له اسلامي امارت سره د معنالرونکو خبرو غوښتونکي دي.
د ټاس خبري اژانس د راپور له مخې، د روسیې بهرنیو چارو وزیر سرګي لاوروف تېره ورځ (جمعه) یوې خبري ناسته کې ویلي چې د ټولیز امنیت تړون سازمان غړي هېوادونه وایي، اړینه ده چې د طالبانو له خوا جوړ شوي حکومت سره دوامداره خبرې اترې ترسره شي.
هغه زیاته کړې: «په ټوله کې موږ د واقعي پروژو پلې کېدو په موخه د طالبانو له دولت سره چې د هېواد کنټرول یې په لاس کې دی، د باثباته، دوامداره او اساسي خبرو پلويان یو، دا غالب نظر د هغو بحثونو جریان کې و چې نن یې تاسې ته وایم.»
هغه د افغانستان له خاورې د «ترهګرو» ډلو ګواښونو ته په اشاره وویل: «د طالبانو حکومت له دغو ډلو سره جنګیږي، موږ په دې مبارزه کې مرسته اړینه بولو.»
دا په داسې حال کې ده چې اسلامي امارت په ځلونو ویلي چې د افغانستان له خاورې نورو هېوادونو ته هيڅ کوم ګواښ متوجه نه دی.
د یادونې ده، څه موده مخکې د روسيې ولسمشر ولاديمير پوتين له اسلامي امارت سره د اړيکو ټينګول اړين بللي وو او ويلي يې وو چې د افغانستان اوسنی حکومت کنټرولوي.
GET IN TOUCH
NEWSLETTER
SUGGEST A STORY
PAJHWOK MOBILE APP