کابل (پژواک، ۴ چنګاښ ۱۴۰۳): د سوېلي افریقا یو شمېر پانګهوالو د افغانستان د کانونو سکټور کې پانګونې ته لېوالتیا ښودلې او د روغتیايي برخې متخصصینو یې ویلي چې افغانستان کې معیاري او مجهز روغتون جوړوي.
د ریاستالوزراء اقتصادي معاونیت پر خپله اېکسپاڼه لیکلي چې د سوېلي افریقا یو شمېر پانګهوالو، علماوو او د روغتیا برخې متخصصینو دغه څرګندونې نن په کابل کې د ریاستالوزراء له اقتصادي مرستیال ملا عبدالغني برادر سره په لیدنه کې کړې دي.
سرچینې لیکلي، د دې لیدنې پر مهال د سوېلي افریقا پانګهوالو په افغانستان کې د پانګونې برخه کې له رامنځته شوو فرصتونو په استفادې د کانونو سکټور کې پانګونې ته لېوالتیا وښوده او زیاته یې کړه چې دوی به د پرمختللې ټکنالوجۍ په مرسته کانونه استخراج او پروسس کړي.
دغه راز، د سوېلي افریقا روغتیايي متخصصینو ویلي، دوی د افغانستان د عامې روغتیا له وزارت سره په همغږۍ غواړي په دغه هېواد کې یو معیاري او مجهز روغتون جوړ کړي، څو افغانانو ته په ښه ډول روغتیايي خدمتونه وړاندې شي.
خو سرچینې په دې اړه نور معلومات نه دي ورکړي.
د سرچینې د معلوماتو له مخې، د ریاستالوزراء اقتصادي مرستیال په دې لیدنه کې د سوېلي افریقا پانګهوالو، علماوو او د روغتیا برخې متخصصینو ته د هر ډول همکارۍ او ملاتړ ډاډ ورکړ.
ملا برادر ویلي، اوسمهال په افغانستان کې د پانګونې لپاره ښه زمینه برابره شوې او ټول کورني او بهرني پانګهوال کولای شي له دغه فرصته استفاده وکړي.
Views: 19
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن