کابل (پژواک، ۱۶ چنګاښ ۱۴۰۳): د روغتیا نړۍوال سازمان ویلي چې د ډينګي میاشې په کورونو او له کورونو بهر له اوبو ډکو لوښو کې وده کوي، خلک باید د اوبو د لوښو، حوضونو او ویالو له پاک ساتلو سره د ډينګي له ناروغۍ مخنیوی وکړي.
د ډینګي تبه څه ده، څرنګه سرایت کوي او د نښې یې کومې دي؟
د ډینګي تبه یوه ویروسي ناروغي ده چې د دينګي پر ویروس ککړو میاشو له لارې انسان ته انتقالېږي، دا ناروغي د هډوکو ماتوونکې تبې په نوم هم پېژندل کېږي، ډېره تبه، د عضلاتو او مفصلونو شدید دردونه، د سر درد، یو ډول جلدي ناروغي او ځيني وخت کانګې هم د دې ناروغۍ نښې دي.
د روغتیا نړۍوال سازمان (ډبیلواېچاو) نن پر خپله اېکسپاڼه «پر ډینګي ناروغۍ د اخته کېدو خطر کم کړئ» تر عنوان لاندې یو پیغام خپور کړی او ویلي یې دي: «د ډینګي میاشې په کورونو او له کورونو بهر له اوبو ډکو لوښو کې وده کوي.»
سرچینې لیکلي: «د اوبو د ساتلو لپاره استفاده شوي توکي لکه بوتلونه، قطي او داسې نور څیزونه لرې کړئ، هره اونۍ د اوبو ساتلو لوښي خالي او پاک کړئ، د اوبو ذخیرې پټې کړئ او له کومو لوښو چې استفاده نه کوئ سرچپه یې کېږدئ او په هغو کې د اوبو د جمع کېدو مخنیوی وکړئ.»
سرچینې زیاته کړې چې ویالې، د اوبو ډنډونه او تشنابونه پاک کړئ او د ګلدانونو اوبه بدلې کړئ.
دغه سازمان په خپل دغه خپاره شوي پیغام کې لیکلي: «ان د یوه بوتل سرپوښ هم کولی شي چې د میاشو د ودې لپاره کافي اوبه ولري.»
Views: 11
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن