غزنيښار (پژواک، ۱۴ زمری ۱۴۰۳): د غزني یو شمېر فرهنګیان وايي چې په دې وروستیو کې په دغه ولایت کې ادبي او فرهنګې ناستې او فعالیتونه کمرنګه شوي خو مسوولین بیا وايي چې په فرهنګي برخه کې فعالیتونه او ناستې په منظم ډول روانې دي.
د غزني دغه فرهنګیان د فرهنګي فعالیتونو کمرنګه کېدو لامل د فرهنګي او ادبي ټولنو اقتصادي ستونزې او له هېواده د یو شمېر فرهنګیان وتل په ګوته کوي.
د غزني د فرهنګیانو له ډلې وحیدالله افغان پژواک ته وویل، دوه- درې کاله مخکې په دغه ولایت کې ډېرې فرهنګي ناستې، مشاعرې، د غزل ماښامونه او د کتابونو مخکتنې ترسره کېدې خو په دې وروستیو کې ډېر کم شوي دي.
نوموړي زیاته کړه: «اقتصادي ستونزو لیکوالان او شاعران له فرهنګي کارونو لرې کړي، کوښښ کوي چې د خپلې کورنۍ لپاره یوه ګوله ډوډۍ پیدا کړي او ادبي کارونو ته یې شا کړې.»
دغه راز، په غزني کې یوه لیکوال سلیمان پژواک ته وویل، غزني یو تاریخي او فرهنګي ولایت دی، باید دې برخې ته یې ډېر کار وشي.
هغه وايي: «مخکې کلونو کې به اطلاعاتو او کلتور ریاست ځانګړي پروګرامونه جوړول، ځوانان به یې راټولول، غونډې او مشاعرې به کېدې خو اوس دا ناستې او غونډې دومره نه کېږي.»
دغه راز، په غزني کې یوه مدني فعال ډاکټر شاهولي هم ورته څرګندونې کوي او ټینګار کوي چې فرهنګي فعالیتونه باید پراخ شي.
یو شمېر نورو کسانو هم ورته څرګندونې وکړې او له حکومتي مسوولینو یې په یاده برخه کې د جدي پاملرنې غوښتنه وکړه.
خو بل لور ته د غزني د اطلاعاتو او فرهنګ رييس ملا حمیدالله نثار پژواک ته وویل، د دوی لپاره فرهنګي فعالیتونه ارزښت لري او په منظم ډول دا هر څه ترسره کوي.
هغه د بېلګې په توګه وویل چې په هرو دوو اونیو کې ځينې ادبي بهیرونه او وړې وړې مشاعرې او ناستي ترسره کوي.
دی زیاتوي چې د ملي او تاریخي ورځو لپاره بیا ځانګړې مشاعرې او ناستې جوړوي.
نثار زیاته کړه: «تېر کال مې د الو ګل مشاعره په شاندارو مراسمو سره ونمانځله خو سږ کال د الو ګل کلنۍ مشاعره د ځينو بوختیاوو له امله ځنډېدلې چې په نږدې راتلونکي به یې ترسره کړو.»
نوموړي دا هم وویل، د ادبي او فرهنګي فعالیتونو ترڅنګ دوی هڅه کوي د ځوانانو د فکري روزنې او یووالي لپاره هم ځینې برنامې ترسره کړي.
د معلوماتو له مخې، شاوخوا درې کاله مخکې په غزني کې د پنځوسو په شاوخوا کې ادبي او فرهنګي ټولنو فعالیت درلود خو اوس یې ګڼ شمېر غیرفعالې دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن