غزنيښار (پژواک، ۱۴ زمری ۱۴۰۳ ) په غزني ولایت کې له میندو او ماشومانو د ملاتړ په موخه د مور له شیدو د تغذیې نړۍواله اونۍ ونمانځل شوه.
په دې اړه جوړې شوې غونډې ته د غزني عامې روغتیا ریاست د لومړنیو مراقبتونو امر ډاکټر محمداشرف وزیري وویل، دغه پروګرام د عامه پوهاوي او له میندو او ماشومانو د ملاتړ په موخه جوړ شوی دی.
هغه زیاته کړه، روانه اونۍ به په مرکز او ولسوالیو کې د مور له شیدو د تغذیې عمومي کمپاین ترسره شي او کورنیو ته به په دې برخه کې پوهاوی او مشوره ورکړل شي.
د نوموړي په وینا، د مور شیدې د ماشوم لپاره خورا ګټورې دي؛ ځکه د نه ورکړې په صورت کې ماشومان پر خوارځواکۍ اخته کېږي.
د هغه په خبره، په ۲۰۲۴ کال کې په دغه ولایت کې ۳۲ ماشومان او لس زره ميندې پر خوارځواکۍ اخته شوي خو د مرستندویه موسسو په همکارۍ یې درملنه شوې ده.
په ورته وخت کې د ماشومانو ناروغیو یوه متخصص ډاکټر نجیبالله علیزي وویل چې د کورنیو ناسم اقتصادي وضعیت، بېوزلي او د نفوسو زیاتوالی پر خوارځواکۍ د ماشومانو د اخته کېدو عمده لاملونه ګڼل کېږي.
هغه ټینګار کوي چې ماشومانو ته باید تر دوه کلنۍ پورې د مور شیدې ورکړل شي، کنه په هر عمر کې یې پر خوارځواکۍ د اخته کېدو امکان شته دی.
د یادونې ده، د ۱۹۹۱ کال راهیسې د مور له شیدو د تعذيي نړۍواله ورځ هر کال په ډېرو هېوادونو کې نمانځل کېږي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن