نیلي (پژواک، ۱۶ زمری ۱۴۰۳): د دایکنډي ځایي مسوولین وایي چې د دغه ولایت په اشترلي ولسوالي کې د خلکو په شخصي لګښت د ۲۷ کیلومتره سړک جوړولو چارې پیل شوې.
د دغه سړک جوړولو چارې تېره ورځ د اشترلي ولسوالۍ د مسوولینو او ځایي خلکو په حضور کې پیل شوې.
د دایکنډي د اشترلي ولسوال مولوي عبدالسلام مزمل پژواک خبري اژانس ته وویل چې دغه سړک د اشترلي ولسوالۍ له مرکز شیخمیران سیمې د دغه ولایت د خدیر ولسوالۍ تر خاکزنګ کوتل پورې د ځایي ادارې په همغږۍ د خلکو په شخصي لګښت جوړیږي.
هغه وویل، د یاد سړک جوړولو لګشت څلور میلیونه او ۴۰۰ زره افغانۍ کېږي چې د خلکو له خوا ورکول کېږي او په خبره یې چې په جوړېدو به یې د خلکو په تګ راتګ کې شته ستونزې هوارې شي.
ورته مهال، د سیمې اوسېدونکي هم د دغه سړک جوړول اړین بولي.
د سیمې یوه اوسېدونکي کاظم وویل، د دغه سړک ټول مصرف د اشترلي ولسوالۍ د شیخمیران او سیادره سیمو د درېیو پراختیايي شوراګانو له خوا راټول شوی دی.
هغه وویل چې د دغه سړک په جوړېدو د سیمې اوسېدونکي کولای شي په ژمي او اوړي کې د دغه ولایت اشترلي او خدیر ولسوالیو بېلابېلو سیمو ته سفر وکړي.
هغه وایي چې پر دغه سړک د څو ولسوالیو اوسېدونکي تګ راتګ کوي.
نوموړي وویل چې اشترلي ولسوالۍ د دایکنډي یوه غرنۍ او صعبالعبوره ولسوالي ګڼل کېږي چې ځينې سیمې یې اوس سړک نه لري او خلک یې له ګڼو ستونزو سره مخ دي.
هغه زیاته کړه چې د سړک نشتوالي له امله د ځنیو سیمو اوسېدونکو خپل ناروغان په خرو روغتون ته انتقالوي.
کاظم دغه راز له حکومته غواړي چې د سړکونو رغولو او ترمیم برخه کې د دې ولسوالۍ له خلکو سره همکاري وکړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن