کابل کې د ازبکستان د تولیداتو نندارتون جوړېږي

کابل (پژواک، ۲۴ زمری ۱۴۰۳): د صنعت او سوداګرۍ وزارت وایي چې د افغانستان او ازبکستان ترمنځ د اقتصادي، سوداګریزو او ټرانزیټي اړیکو د پیاوړتیا او پراختیا په موخه کابل کې د ازبکستان هېواد د تولیداتو نندارتون جوړیږي.

د صنعت او سوداګرۍ وزارت نن چهارشنبه په یوه اعلامیه کې ویلي، ټاکل شوې چې دا نندارتون د زمري میاشتې له ۲۸ مې تر ۲۹ مې د کابل ښار حضوري چمن کې د افغانستان د نړۍوالو نندارتونونو مرکز کې جوړ شي.

دغه وزارت له هېوادوالو غوښتي څو له دغه نندارتون څخه لیدنه وکړي.

 دا په داسې حال کې ده چې تېرو درېیو کلونو کې د افغانستان د داخلي تولیداتو ورته نندارتونونه هم د هېواد دننه او بهر جوړ شوي دي.