مزارشریف (پژواک، ۵ وږی ۱۴۰۳): د افغانستان فاریاب ولایت استقلال فوټبال لوبډلې خپله دوستانه لوبه د ازبکستان سرخاندریا ولایت قزریق لوبډلې ته دوه - صفر وبایلله.
د افغانستان فاریاب ولایت استقلال فوټبال لوبډلې پرون ماښام د وږي په څلورمه د ازبکستان سرخاندریا قزریق لوبډلې سره د دغه هېواد په ترمذ ښار کې دوستانه لوبه ترسره کړه.
د افغانستان د فوټبال فدراسیون د اجرایې هیأت غړي عبدالحق فیضي پژواک خبري اژانس ته وویل چې د دواړو لوبډلو ترمنځ دغه دوستانه لوبه پرون ماښام شپږ بجې د ازبکستان هېواد په ترمذ ښار کې ترسره شوه.
نوموړي د دغو لوبو د ترسراوی موخه د ورزشکارانو د استعدادونو وده او له بهرنیو لوبغاړو سره د هغوی بلدتیا په ګوته کړه.
هغه زیاتوي چې په یاده سیالي کې د ازبکستان هېواد سرخاندریا قزریق لوبډلې د افغانستان فاریاب ولایت استقلال لوبډلې ته دوه - صفر ماتې ورکړه.
په همدې حال د ازبکستان هېواد د سرخاندریا ولایت د ورزش مسوول سنجر شاهمرادووف د دغه لوبو ترسره کول د دواړو هېوادو د اړیکو په پراختیا کې مهم بولي.
دغه راز، د ازبکستان ترمذ ښار کې د افغانستان سرپرست قونسل محمدادریس زرشویي هم د دغه ډول لوبو ترسراوی د دواړو هېوادونو د فرهنګي اړیکو په ټنګښت او دوام کې ګټور ګام یاد کړ.
بلخوا، د دې سیالي لوبغاړي بیا د دغه ډول لوبو ترسره کول د ورزش او ورزشکارانو د استعدادونو د ودې لپاره مهم ګڼي.
د افغانستان فاریاب ولایت استقلال فوټبال لوبډلې یوه لوبغاړي حبیب شریف پژواک ته وویل، د دغه ډول لوبو ترسره کول مرسته کوي څو ورزشکاران وده او پرمختګ وکړي.
دا په داسې حال کې ده چې تېره ورځ د افغانستان د اوولس کلنو فوټبال ملي لوبډلې د ازبکستان د ۱۷ کلنو ملي لوبډلې ته له ماتې وروسته د مرکزي اسیا یا کافا ملتونو جام اتلولي خپله کړه.
GET IN TOUCH
NEWSLETTER
SUGGEST A STORY
PAJHWOK MOBILE APP