جاپان د افغانستان په نهو ولایتونو کې ۱۶۵ لومړني ښوونځي جوړوي

کابل (پژواک، ۱۶ وږی ۱۴۰۳): کابل کې د جاپان سفیر ویلي، هېواد یې د افغانستان د تاریخي میراثونو ساتنې لپاره ۳۰۰ زره ډالر ځانګړي کړي او په پام کې لري چې د دغه هېواد په نهو ولایتونو کې ۱۶۵ لومړني ښوونځي هم جوړ کړي.

دغه څرګندونې له ارګ څخه په خپره شوې خبرپاڼه کې راغلي دي.

خبرپاڼه کې لیکل شوي چې تېره ورځ د افغانستان د رياست‌الوزراء سياسي مرستيال مولوي عبدالکبیر، کابل کې د جاپان له سفیر تاکایوشي کورومایا سره وکتل.

سرچینه زیاتوي، کابل کې د جاپان سفیر افغانستان کې د نشه‌يي توکو پر وړاندې د اسلامي امارت مبارزه ستايلې او ویلي یې دي، جاپان له وړاندې له نشه‌یي توکو سره د مبارزې لپاره له افغانستان سره لس میلیونه ډالره مرسته اعلان کړې ده.

په خبرپاڼه کې راغلي، کورومایا ویلي چې جاپان د افغانستان د تاریخي میراثونو او ابداتو د ساتنې او د اړوندو ادارو د ظرفیت لوړولو لپاره په پلان کې لري، چې په لومړي قدم، په کابل کې ملي موزیم ته د ۳۰۰زره ډالرو مرسته ځانګړې کړي.

د سرچينې د معلوماتو له مخې، کابل کې د جاپان سفیر د دواړو هيوادونو ترمنځ د اړیکو پر لا پیاوړتیا د ټینګار ترڅنګ ویلي، هېواد یې په پام کې لري چې د افغانستان په نهو ولایتونو کې ۱۶۵ لومړني ښوونځي جوړ کړي.

په خبرپاڼه کې راغلي، کورومایا زیاته کړې، جاپان د افغان ټولنې ارزښتونو ته احترام لري، توکیو د اسلامي امارت پرمختګونه څاري او د «جي۷» هېوادونو او اسلامي امارت تر منځ د اړیکو رامنځته کېدو هڅه کوي.

د ریاست‌الوزراء سیاسي مرستیال، د کابل او توکیو اړیکې خورا مهمې او د دواړو لورو په ګټه بللي او هیله یې څرګنده کړې چې د دوحې د درېیمې ناستې ژمنې ژر پلې شي.

هغه زیاته کړې، اسلامي امارت د «مسؤول حکومت» په توګه ټولې ژمنې په یوازې ځان او د چا له مرستې پرته پوره کړې دي.