غزني ښار (پژواک، ۲۰ وږی ۱۴۰۳): د غزني امنیه قومانداني وايي چې د دغه ولایت په مرکز کې د یوې ترافیکي پېښې له امله دوه کسان مړه شوي او اووه نور ټپیان دي.
د غزني امنیې قوماندانۍ ویاند ابو خالد سرحدي پژواک خبري اژانس ته وویل چې نن له غرمې مخکې د غزني ښار اړوند د روضې کوتل په سیمه کې د دوو مسافر وړونکو موټرو ترمنځ ټکر شوی دی.
هغه وايي چې په دې پېښه کې دوه کسان مړه شوي او د یوې ښځې او یو ماشوم په ګډون اووه نور ټپيان دي.
ده وویل چې د لویو لارو ساتونکو د یادې پېښې ټپیان او مړي د غزني حوزوي روغتون ته انتقال کړي دي.
د نوموړي په وینا، دغه پېښه د موټرچلوونکو د بېاحتیاطۍ له امله رامنځته شوې ده.
دا په داسې حال کې ده چې څلور ورځې مخکې هم په یاده سیمه کې د یوې ترافیکي پېښې له امله درې کسان مړه شوي وو.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن