بلخ کې د ترافیکي پېښې له امله شپږ کسان ټپیان شوي

مزارشریف (پژواک، ۲۹ وږی ۱۴۰۳): د بلخ امنیتي مسوولین وایي چې د دغه ولایت په دهدادي ولسوالي کې د ترافیکي پېښې له امله شپږ کسان ټپیان شوي دي.

د بلخ امنیې قوماندانۍ په خپره شوې خبرپاڼه کې راغلي چې نن د دهدادي ولسوالۍ شېراباد کلي کې د دوو کرولا موټرو د ټکر له امله شپږ کسان ټپیان شوي دي.

خبرپاڼه زیاتوي چې ټپیان د امنیتي کسانو له لوري روغتون ته لېږدول شوي دي.

د یادې پېښې د لامل په اړه څه نه دي ویل شوي خو ډېری مهال دغه ډول پېښې د چلوونکو د بې‌احتیاطۍ له امله کېږي.