کابل (پژواک، ۲۷ تله ۱۴۰۳): د فارياب امنيه قومانداني وايي چې د فارياب – بادغيس لویې لارې په «اق کوتل» سيمه کې پر یوه مسافر وړونکي موټر د وسلهوالو غلو په بريد کې د دوو امنیتي سرتېرو او یوې ښځې په ګډون پنځه کسان وژل شوي او پنځه نور ټپيان شوي دي.
د فارياب د امنيې قوماندانۍ وياند عبدالله مرادي د پژواک اژانس خبریال ته وویل چې دغه پېښه پرون ماښام د فارياب - بادغيس پر لویه لار د «اق کوتل» په سيمه کې شوې ده.
مرادي زیاته کړه: «د لومړنیو څېړنو له مخې، وسلهوالو غلو یو مسافر وړونکی موټر دروي چې دوه مجاهدین هم په کې وو، کله چې مجاهدینو له غلو سره مقاومت وکړ، د ډزو په پایله کې دواړه مجاهدین او د یوې ښځې په ګډون درې ملکي وګړي وژل شوي او پنځه نور ټپیان دي چې اوس په روغتون کې دي.»
هغه زياته کړه چې د دې پېښې په اړه نورې څېړنې هم روانې دي.
د یادې پېښې دوو ټپيانو پژواک اژانس خبريال ته ویلي چې په یوه فلاینکوچ موټر کې له ميمنې ښاره روان وو چې په «اق کوتل» سيمه کې دوو وسلهوالوو غلو چې په تفنګچه او کلاشينکوف سمبال وو، موټر ودراوه.
یو ټپي سیفالله وویل، کله چې موټر ودرېد، د اسلامي امارت دوه سرتیرو چې په موټر کې وو، پر غلو ډزې وکړې، خو غله پرې ونه لګېدل.
هغه زیاته کړه: «وروسته دواړو وسلهوالو غلو پر موټر ډزې وکړې چې په پایله کې یې د اسلامي امارت د دواړو مجاهدینو په ګډون پنځه کسان ووژل شول او پنځه نور ټپیان شول، وسلهوالو زما او نورو ټپیانو لاسونو وتړل او یوې کندې ته یې وغورځلو، خو د یادو دواړو مجاهدینو له وسلو پرته یې هیڅشی له موږ وانه خیستل، پیسې، موبایلونه او نور شیان مو پر خپل ځای وو.»
GET IN TOUCH
NEWSLETTER
SUGGEST A STORY
PAJHWOK MOBILE APP