<p style="text-align: justify;">سرپل، پاراخ (پژواک، ۱۸ مرغومی ۱۴۰۳): ځایي مسوولین وایي چې د روان کال په تېرو ۱۰ میاشتو کې د سرپل او پنجشېر په مرکزونو او ولسوالیو کې ۴۰ ښوونځي او مدرسې بیارغول شوي دي.</p>
<p style="text-align: justify;">د سرپل د والي ویاند مولوي حبیبالله مسرور پژواک خبري اژانس ته وویل چې د سرپل د پوهنې ریاست د روان کال په ترڅ کې د پوهنې وزارت له بودجې د څه باندې اته میلیونه او ۳۶۰ زره افغانیو په لګښت ۱۴ ښوونځي او تعلیمي بنسټونه بیارغولي دي.</p>
<p style="text-align: justify;">هغه وویل چې ۹ نور ښوونځي د څه باندې ۱۲۵ زرو امریکایي ډالرو په لګښت له ماشومانو سره د مرستې موسسې په ملاتړ بیارغول شوي دي.</p>
<p style="text-align: justify;">د مسرور په خبره، دغه راز د یوې موسسې له خوا ۱۵ ښوونځیو ته د څه باندې دوه میلیونه او ۷۶ زره افغانیو په لګښت شنې باغچې جوړې شوې دي.</p>
<p style="text-align: justify;">د سرپل د والي ویاند وویل، دا شمېر ښوونخي او تعلیمي بنسټونه د دغه ولایت په مرکز او ولسوالیو کې بیارغول شوي چې په هغو کې د زدهکوونکو لپاره مناسب درسي چاپېریال رامنځته شوی دی.</p>
<p style="text-align: justify;">نوموړي وویل، اوسمهال په دغه ولایت کې سل ښوونځي ودانۍ نه لري او یو شمېر ښوونځي جزیي بیارغونې ته اړتیا لري.</p>
<p style="text-align: justify;">بلخوا، د سرپل د یوه ښوونځي یو ښوونکی حفیظ الله وایي چې د ښوونځيو بیارغونه د زدهکوونکو په زدهکړه او هڅونه کې مثبت اغېز لري.</p>
<p style="text-align: justify;">هغه وویل چې د ښوونځیو بیارغونې برخه کې د پوهنې ریاست اقدام د ستاینې وړ دی او دا چاره د زدهکړو د کیفیت لوړېدو کې مهم رول لري.</p>
<p style="text-align: justify;">هغه وایي چې ښوونځيو ته پاملرنه زدهکوونکو ته دا انګېزه ورکوي چې دوی په ټولنه کې ارزښت لري او هغوی درس ویلو ته لا هڅېږي.</p>
<p style="text-align: justify;">یوه زدهکوونکي دوستمحمد وویل: «ډېر خوښ یم چې زموږ د ښوونځي زړې ودانۍ ځان ته نوې او ښکلې بڼه خپله کړې ده.»</p>
<p style="text-align: justify;">هغه زیاته کړه چې مخکې د ټولګیو دروازې او پنجرې ماتې وې او دېوالونه یې تخریب شوي وو، خو اوس له نېکه مرغه د ښوونځي ټولو ستونزو ته رسېدنه شوې ده.</p>
<p style="text-align: justify;">د سرپل د پوهنې ریاست د معلوماتو له مخې، په دغه ولایت کې ۴۱۱ ښوونځي موجود دي چې له دې ډلې ۱۰۰ یې ودانۍ نه لري او دغو ښوونځيو کې ۱۸۰۹۱۴ نجونې او هلکان درس وایي.</p>
<p style="text-align: justify;">بلخوا، د پنجشېر ځایي مسوولین وایي چې د دغه ولایت د پوهنې ریاست د ۱۸ ښوونځیو او مدرسو ودانۍ د شپږ میلیون افغانیو په لګښت بیارغول شوي دي.</p>
<p style="text-align: justify;">د پنجشېر د اطلاعاتو او فرهنګ رییس نصرالله ملکزاده پژواک خبري اژانس ته وویل چې د روان کال له پیله تر اوسه پورې د دغه ولایت د پوهنې ریاست د ودانۍ په ګډون د ښوونځيو او مدرسو ۱۸ ودانۍ بیارغول او ګټې اخیستنې ته سپارل شوې دي او لګښت یې د پوهنې وزارت له خوا ورکړل شوی دی.</p>
<p style="text-align: justify;">نوموړي وویل چې دې بیارغونه کې رنګ، د ښوونځيو د چتونو ترمیم، د تشنابونو ترمیم، کړکۍ، دروازې، ښیښې او زینې شامل دي، دا ښوونځي او مدرسې د پنجشېر د مرکز په ګډون په ۷ ولسوالیو کې رغول شوي دي.</p>
<p style="text-align: justify;">بلخوا، د پنجشېر د پوهنې رییس حبیبالله نوري ویلي چې د دغو پروژو په بشپړېدو سره د ښوونځيو او مدرسو زرګونو زدهکوونکو مناسب درسي چاپېریال ته لاسرسی پیدا کړی دی.</p>
