پنځه افغان لوبغاړي په ایران کې د بډمنټون سیالیو کې ګډون کوي

کابل (پژواک، ۴ سلواغه ۱۴۰۳): د المپیک ملي کمېټه وایي، د بډمنټون پنځه لوبغاړي د ایران په کوربه‌توب د (فجر نړۍوال چلنج) سیالیو کې ګډون کوي.

د المپیک ملي کمېټې پر خپله اېکس‌پاڼه لیکلي، د بډمنټون ملي فدراسیون پنځه لوبغاړي به د ایران په (فجر نړۍوال چلنج) سیالیو کې د ګډون په موخه نن دغه هېواد ته سفر وکړي.

سرچینې لیکلي، یادې سیالۍ د ایران په سمنان ښار کې د روانې جنورۍ میاشتې په ۲۸مه پیلېږي او د فبرورۍ تر دویمې به دوام وکړي.

د المپیک ملي کمېټې زیاته کړې چې په دغو سیالیو کې درې لوبغاړي له افغانستانه او دوه نور له جرمني هېواد د افغانستان په استازولۍ ګډون وکړي.

د سرچینې د معلوماتو له مخې، په دغو سیالیو کې له ۲۰ هېوادونو ۱۰۰ لوبغاړي ګډون کوي.