<p style="text-align: justify;">کابل (پژواک، ۹ وری ۱۴۰۴): د افغانستان د فوټبال فدراسیون وايي چې د هېواد له ۱۷ کلنو کمعمره د فوټبال ملي لوبډله د ۲۰۲۵ کال اسیا جام سیالیو کې د ګډون لپاره د سعودي عربستان جدې ښار ته ولاړه.</p>
<p style="text-align: justify;">د افغانستان د فوټبال فدراسیون پر فېسبوکپاڼه د یوې <a href="https://www.facebook.com/affofficial/posts/pfbid02aQ77FAdsoNTMVEcyfRNjGeAXrtPyweuWNzvNJY5BdTWy7gDr34vmWedCzWJzGyEl"><strong>خ</strong><strong>برپاڼې</strong></a> په خپرولو لیکلي چې د هېواد له ۱۷ کلنو کمعمره د فوټبال ملي لوبډله نن سهار (شنبه) سعودي عربستان ته ولاړه.</p>
<p style="text-align: justify;">د ویلو ده چې د ۲۰۲۵ کال اسیا جام سیالۍ به د روان زېږدیز کال د اپرېل له ۳مې تر ۲۰مې د سعودي عربستان په کوربهتوب ترسره شي.</p>
<p style="text-align: justify;">په یادو سیالیو کې ۱۶ لوبډلې ګډون کوي او افغانستان په Cګروپ کې د سوېلې کوریا، یمن او اندونیزیا له لوبډلو سره په یوه ګروپ کې لوبېږي.</p>
<p style="text-align: justify;">څه موده مخکې د هېواد له ۱۷ کلنو کمعمره د فوټبال ملي لوبډلې سرمربي الیاس منوچهر پژواک خبري اژانس ته ویلي و چې د هېواد لوبډله د ۲۰۲۵ کال اسیا جام په سیالیو کې سختې لوبې په مخ کې لري؛ خو په دغو سیالیو کې د پیاوړي ګډون لپاره چمتو ده.</p>
