پکتيا مرکزي زندان کې د ۱۰ لوبډلو ترمنځ د واليبال سيالۍ پای ته ورسېدې

<p style="text-align: justify;">ګردېز (پژواک، د غبرګولي لومړۍ نېټه ۱۴۰۴): د پکتیا سیمه‌ییز مسوولین وایي، د دغه ولایت په مرکزي زندان کې د لسو لوبډلو ترمنځ د والیبال سیالۍ د پکتیا پوهنتون د محصلینو لوبډلې په بریا پای ته ورسېدې.</p>

<p style="text-align: justify;">يادې سيالۍ يوه اونۍ مخکې پيل شوې وې چې څلور لوبډلې له زندانيانو او پاتې شپږ نورې له دولتي ادارو په کې ګډون درلود.</p>

<p style="text-align: justify;">د يادو سياليو د پای‌لوبې مراسمو کې د پکتيا زندان ریيس عبدالغني عادل وويل چې یادې سیالۍ د زندانيانو لپاره تفريح برابرولو او په ټوله کې د نشه‌يي توکو پر وړاندې د مبارزې لپاره ترسره شوې وې.</p>

<p style="text-align: justify;">هغه وويل، د ياد تورنمنټ پای‌لوبه د زندانيانو د اې او پکتيا پوهنتون محصلینو لوبډلو ترمنځ ترسره شوه چې د پوهنتون لوبډلې وګټله.</p>

<p style="text-align: justify;">هغه وويل چې ورزشي لوبې او پروګرامونه د زندانيانو پر رواني روغتيا ژوره اغيزه لري.</p>

<p style="text-align: justify;">ورته وخت کې، يو شمېر زندانيان هم د زندان په داخل کې د واليبال لوبو برابرېدو باندې خوښي څرګندوي.</p>

<p style="text-align: justify;">يو تن زنداني عبدالله پژواک خبري اژانس ته وويل چې دا ډول لوبې زندانيانو تفريح او د رواني ناروغيو څخه د مخنيوي لپاره ګټورې دي.</p>

<p style="text-align: justify;">يو بل زنداني څنارګل هم وایي، زندانيانو لپاره لوبو برابرول د زندانيانو د فزيکي او رواني روغتيا لپاره خورا مهمې دي.</p>

<p style="text-align: justify;">هغه زیاته کړه چې له دې مخکې په زندان کې ورته د ديني، حرفوي او عصري زده‌کړو زمينه برابره شوې وه.</p>