په ننګرهار کې درېیو کسانو ته تعزیري سزا ورکړل شوه

کابل (پژواک، ۱۴ تله ۱۴۰۴): ستره محکمه وایي، په ننګرهار ولایت کې درېیو کسانو ته په عام محضر کې تعزیري سزا ورکړل شوه.

د سترې محکمې په خبرپاڼه کې راغلي چې د ننګرهار ولايت خوګياڼو ولسوالۍ ابتدائيه محکمې د پرېکړې له مخې درېیو کسانو ته د لواطت او غلا په تور په عام محضر کې تعزیري سزا ورکړل شوه.

خبرپاڼې له مخې، ابتدائیه محکمې ياد کسان په يوه ـ یوه کال او شپږ ـ شپږ مياشتې تنفيذي بند او ۳۹ـ ۳۹ دُرو تعزیري سزا محکوم کړي وو.