کابل (پژواک، د غويي لومړۍ نېټه ۱۴۰۵):د راپورونو له مخې، لسګونه امریکايي پخواني سرتېري او د پوځیانو د کورنیو غړي د واشنګټن ډيسي په کانګرس کې په یوه اداري ودانۍ کې راټول شوي او د امریکا د ایران پر وړاندې جګړې پر ضد یې اعتراض کړی دی.
نیوز۱۸ راپور ورکړی چې معترضینو د جګړې د دوام پر ضد شعارونه ورکړي دي.
د راپور له مخې، له ۶۰ څخه ډېر د امریکا د پوځ پخواني سرتېري، د ځینو پخوانیو خدماتي غړو او د پوځیانو د کورنیو له غړو سره یو ځای، د سولهییز لاریون وروسته نیول شوي دي.
راپور زیاتوي چې دغه پخواني سرتېري د ودانۍ دننه راټول شوي وو او ډېرو یې پوځي جامې اغوستې وې.
د راپور له مخې، هغوی غوښتنه کوله چې د امریکا بهرنۍ پوځي لاسوهنه پای ته ورسېږي او داسې بینرونه یې له ځان سره درلودل چې پرې لیکل شوي وو: «د ایران پر وړاندې جګړه پای ته ورسوئ» او «موږ بله جګړه نشو زغملی».
د تنظیموونکو په وینا، دا اعتراض د هغو کسانو د یاد لپاره ترسره شوی چې په تېرو جګړو کې وژل شوي دي.
د یادونې وړ ده چې دا اعتراض داسې مهال ترسره کېږي چې د ایران او امریکا ترمنځ کړکېچ لا هم دوام لري.
