کابل (پژواک، ۱۵ غبرګولی ۱۴۰۵): د پکتیا امنیه قومانداني وایي چې د دغه ولایت د ډنډپټان ولسوالۍ په ناري ژوره سیمه کې ۲۰ میله بېلابېل ډول وسلې او یو شمېر مهمات کشف او ترلاسه شوی دي.
د یادې قوماندانۍ د رسنیو دفتر د خبرپاڼې له مخې، په ترلاسه شوو وسلو کې اته کلاشینکوفونه، اته شاجورونه، ۱۲ تومانچې، ۲۰ د کلاشینکوف ستنې، درې د M4 میلونه او ۳۰۰۰ د تومانچې مرمۍ شامل دي.
خبرپاڼه زیاتوي، یاد مهمات له پاکستانه افغانستان ته قاچاق کېدل، خو امنیتي ځواکونو د عملیاتو پر مهال کشف او ضبط کړل.
د معلوماتو له مخې، قاچاقکوونکي له سیمې تښتېدلي، خو امنیتي ځواکونه د هغوی د نیولو هڅې روانې ساتلې دي.
