کابل (پژواک، ۱۶ غبرګولی ۱۴۰۵): د افغانستان کرکټ بورډ وایي، افغان ابدالیان لوبډله د هند او سریلانکا له الف لوبډلو سره د درې اړخیزې لوبلړۍ ترسره کولو لپاره سریلانکا ته ولاړه.
کرکټ بورډ د یوې خبرپاڼې په خپرولو ویلي چې افغان ابدالیان لوبډله د هند او سریلانکا الف لوبډلو پر وړاندې په درې اړخیزه لوبلړۍ کې د ګډون په موخه نن سهار سریلانکا ته روانه شوه.
دغهراز، د سریلانکا، هند او افغانستان ترمنځ دغه درې اړخیزې یو ورځنۍ سیالۍ به د جون په نهمه په سریلانکا کې پیل شي او د همدې میاشتې تر ۲۱مې به دوام ولري.
د کرکټ بورډ د معلوماتو له مخې، افغان لوبډله به په دغو سیالیو کې خپله لومړۍ لوبه د جون په ۱۱مه د هند له الف لوبډلې سره ترسره کړي.
