روسیه، امریکا او اوکراین راتلونکې مياشت په ابوظۍ کې د سولې په اړه خبرې کوي

کابل (پژواک) – ټاکل شوې روسیه، امریکا او اوکراین د نومبر په لومړۍ نیمایي کې د متحده عربي اماراتو په پلازمېنه ابوظبۍ کې د سولې په اړه خبرې وکړي؛ په همدې حال کې دواړو لورو د ۲۷۰-۲۷۰ جنګي بندیانو او د وژل شوو سرتېرو د جسدونو تبادله هم کړې ده.
د شینهوا خبري اژانس د راپور له مخې، د کرملین ویاند دیمیتري پسکوف ویلي چې د درې اړخیزو خبرو تمرکز به د سولې له هوکړې وروسته د روسیې او اوکراین د امنیت پر تضمینونو وي.
بلخوا، سپینې ماڼۍ ویلي چې روسیې او اوکراین د اوکراین په جنوبي برخه کې د اولېشکي ښار لپاره پر لنډمهالي اوربند هوکړه کړې ده. د رویټرز د راپور له مخې، دغه اوربند به د اکټوبر له ۲۹مې پیل شي، څو بشري مرستې سیمې ته ورسېږي او ملکي وګړي له خوندي لارې ووځي.
د روسیې د دفاع وزارت ویلي چې روسیې او اوکراین د جګړې ۲۷۰-۲۷۰ بندیان تبادله کړي دي.
همدارنګه، د شینهوا د راپور له مخې، د بېلاروس دولتي خبري اژانس «بلتا» ویلي چې روسیې او اوکراین د بېلاروس او اوکراین پر پوله د وژل شوو سرتېرو د جسدونو بله تبادله هم کړې ده. په دې تبادله کې روسیې اوکراین ته د ۲۵۲ سرتېرو جسدونه سپارلي او اوکراین روسیې ته د ۲۵ سرتېرو جسدونه سپارلي دي.