چاريکار ( پژواک د لړم لومړۍ نېټه ٩٠): يو ه ځانمرګي بريد کوونکي، چې غوښتل يې د هيواد د کورنيو چارو پر وزير بريد وکړي، د پوليسو له خوا تر ټپي کېدو او نيول کېدو وروسته ساه ورکړه.
د پروان والي عبدالبصير سالنګي نن له غرمې وروسته په يوې خبري ناسته کې وويل، چې يوه ځانمرګي بريد کوونکي چې غوښتل يې د دغه ولايت د سيد خېلو د ولسوالۍ د سړک په اوږدو کې د کورنيو چارو پر وزير ستر پاسوال بسم الله محمدي بريد وکړي، د هغه د ساتوونکيو له خوا په ډزو سره ټپي او وروسته ونيول شو.
سالنګي وويل، چې دغه تن هغه مهال د کورنيو چارو پر وزير د بريد نيت درلود، چې محمدي د پنجشير ولايت خوا ته روان و او د دغه ولايت د سيدخېلو د ولسوالۍ په سړک کې د ماسپيښين د لمانځه لپاره له موتر څخه ښکته شوى و .
نوموړي زياته کړه، چې د کورنيو چارو د وزير ساتونکي يوه ځوان ته چې له يوه پولګوټي څخه راووت او د کورنيو چارو وزير خوا ته روان و، د ودرېدو امر وکړ او سملاسي يې ورباندې ډزې وکړې.
سالنګي څرګنده کړه، چې ځانمرګي بريد کوونکي د ټپونو له امله، د خپل واسکټ د چولو توان له لاسه ورکړى و .
نوموړي زياته کړه، چې ياد تن له ټپي کېدو وروسته ونيول شو او د دغه ولايت امنيه قوماندانۍ ته وليږدول شو، خو وروسته يې ساه ورکړه.
سرچينې زياته کړه، چې تراوسه د ځانمرګي بريد کوونکي هويت او د اوسيدو ځاى نه دى تثبيت شوى او په دې اړه څيړنې دوام لري.
د پروان والي وويل، چې کشفي ارګانونه د دغه ولايت په مربوطاتو کې د ځانمرګي بريد له پلان څخه خبر و او امنيتي ځواکونه د احضاراتو په حالت کې و .
د کورنيو چارو وزير يوه ساتونکي ميرزا محمد پژواک ته وويل: ((نن په يوه بجه د سيد خېلو پر سړک د اوبو د ويالې ترڅنګ ولاړ وم، چې يو ځوان له پولګوټي لاندې راووت او د کورنيو چارو د وزير خوا ته روان شو. ))
نوموړي زياته کړه، چې پر ياد تن يې د درېدو غږ وکړ، خو هغه پام ونکړ او بالاخره يې ورباندې ډزې وکړې.
