خوست ښار-مهترلام (پژواک ٣٠ ليندۍ ٩٠): په خوست او لغمان ولايتونو کې د يوه قوماندان په ګډون ١٠ وسله وال طالبان له دولت سره يوځاى شوي دي.
د خوست د ولايت له مطبوعاتي دفتر څخه د ليندۍ په ٣٠مه پژواک اژانس ته په رالېږل شوې خبرپاڼه کې راغلي، چې نن په دغه ولايت کې د دولت ۹ وسله وال مخالفين د سولې له پروسې سره يوځای شول.
د سرچينې په وينا، ياد کسان ټول د خوست د تڼيو ولسوالۍ اوسېدونکي دي او په همدې سيمه کې يې د دولت ضد فعاليتونه ترسره کول.
په خبرپاڼه کې زياته شوې، چې د سولې له پروسې سره يوځای شوو کسانو ژمنه وکړه، چې له دې وروسته به د هېواد د بيارغونې او امنيت په برخه کې له افغان دولت سره مرسته کوي.
په خوست کې د سولې د عالي شورا د ولايتي دفتر له پرانيستو وروسته دغه لومړی ځل دی، چې د دولت وسله وال مخالفين د سولې له پروسې سره يوځای کېږی.
د يو بل خبر له مخې، په لغمان ولايت کې هم د وسله والو طالبانو يو سيمه ييز قوماندان له دولت سره يوځاى شوى دى.
د لغمان د دولت شاه او عليشنګ ولسواليو د سيمه ييزو پوليسو قوماندان حاجي نورالله پژواک اژانس ته وويل، ياد قوماندان هفته ګل نوميږي او په دولت شاه ولسوالۍ کې يې د دولت ضد فعاليت کاوه.
د هغه په وينا، دغه کس نن په سيمه کې له افغان دولت سره يوځاى شو.
د وسله والو طالبانو سيمه ييز قوماندان هفته ګل پژواک اژانس ته وويل، چې پخوا د ناپوهۍ له امله په پاکستان کې د يو شمېر کسانو له خوا وسله وال مخالفت ته هڅول شوى و.
د ده په وينا، له دې وروسته به هڅه کوي، چې خپل نور ملګري هم د سولې له پروسې سره يوځاى کړي او له جګړې لاس واخلي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن