کندهار (پژواک ١٦ کب ٩٠): د کندهار ولايت د امنيه قوماندانۍ پوليسو په ډنډ ولسوالۍ کې زر کېلوګرامه خام چرس ونيول.
د کندهار ولايت د مطبوعاتي دفتر مسوول زلمي ايوبي د کب په ١٦مه پژواک خبري اژانس ته وويل، چې دغه زر کېلوګرامه چرس تېره ورځ د يادې ولسوالۍ د سپين ډاګ په سيمه کې د تلاشۍ پر مهال نيول شوي دي.
هغه زياته کړه، دغه چرس، چې په ډېر مهارت ځاى پر ځاى شوي وو، په يوه تراکتور کې لېږدول کېدل.
د ده په خبره، له دغو نشه يي توکو سره سره په تړاو څوک نه دي نيول شوي، خو په اړه يې پلټنې روانې دي.
دغه راز پوليسو تېره ورځ په ژېړۍ ولسوالۍ کې د عملياتو پر مهال ٢٣پنځه کېلويي بوشکې چاودېدونکي توکي کشف او له منځه وړي دي.
ايوبي وايي، د دغو دواړو عملياتو پر مهال کومه وسلواله نښته نه ده شوې او نه هم امنيتي او ملکي وګړو ته مرګ ژوبله اوښتې ده.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن