اسعداباد (پژواک ٢٧ ورى٩١): د لغمان د قرغيو ولسوالۍ د لومړنۍ محکمې رييس د کونړ-جلال پر لويه لاره د ناپېژانده وسلوالو له خوا ووژل شو.
د کونړ امنيه قوماندان مل پاسوال عوض محمدنذيري د وري په ٢٧مه پژواک خبري اژانس ته وويل، چې دا پېښه نن سهار شاوخوا اوه نيمې بجې د اسعداباد په سلامپور سيمه کې رامنځته شوه.
هغه زياته کړه، چې د لغمان د قرغيو ولسوالۍ د ابتدائيه محکمې قاضي امين الحق، چې د کونړ اوسېدونکى و، خپلې دندې ته روان و، چې په ياده سيمه کې تر وسلوال بريد لاندې راغى او ووژل شو.
د اسعداباد د ښاري محکمې رييس قاضي محب الله وايي، چې قاضي امين الحق له دې وړاندې په کونړ کې د دېوان مدني او دېوان حقوق عامه د رييس په توګه دندې ترسره کړې او وروسته يې د ننګرهار د ښاري محکمې د رييس په توګه هم دنده ترسره کړې ده.
نوموړى وايي، چې امين الحق اوسمهال د قرغيو ولسوالۍ د ابتدائيه محکمې رييس و، چې د ناپېژانده وسلوالو له خوا ووژل شو.
تر اوسه د دې وژنې مسووليت چا پر غاړه نه دى اخيستى.
د يادونې ده، چې تېره مياشت د ننګرهار د بهسودو ولسوالۍ يو قاضي د ناپېژانده وسلوالو له خوا له تښتول کېدو وروسته وژل شوى و.
