چاريکار (پژواک ٤ چنګاښ ٩١): د پروان والي وايي، د دغه ولايت په شينواري ولسوالۍ کې د وسلوالو طالبانو تر خپل منځ نښته شوې او په کې دوه تنه وژل شوي، خو طالبان بيا دا څرګندونې ردوي.
د پروان والي عبدالبصير سالنګي وايي، چې وسلوالو طالبانو د پروان د کوه ساپي ولسوالۍ اوسېدونکى ميرزاخان د دغه ولايت د شينواري ولسوالۍ لپاره ولسوال نومولى، خو د سيمې طالبان ورسره مخالفت کوي.
هغه دعوه کوي، چې د همدې اختلاف له امله ميرزاخان د غبرګولي په ٢٩مه په شينواري ولسوالۍ کې د طالبانو قوماندان ملا عزت الله وواژه.
دا په داسې حال کې ده ، چې د کورنيو چارو وزارت د غبرګولي په ٢٩مه ويلي و، چې ملاعزت الله د سيمه ييزو پوليسو په عملياتو کې وژل شوى دى.
د پروان والي وايي، چې ميرزاخان د ملاعزت الله تر وژل کېدو يوه ورځ وروسته د ملاقادر لنګ په نوم د طالبانو يو سرګروپ هم د خپل منځي اختلافونو له امله په ياده ولسوالۍ کې وواژه.
د سالنګي په وينا، له همدې امله وړمه ورځ د دې ولسوالۍ په قول هېر سيمه کې د وسلوالو طالبانو ترمنځ نښته هم وشوه.
دى وايي، چې د طالبانو دغه اختلافات او د دولتي ځواکونو هڅې به په دې ولسوالۍ کې د طالبانو د له منځه تلو لامل شي.
سالنګي وايي، دولتي ځواکونه پلان لري چې د دې ولسوالۍ په بېلابېلو سيمو کې لس امنيتي پوستې جوړې کړي.
د قول هېر د سيمې اوسېدونکى حاجي سيداقا هم تاييدوي، چې ملاعزت الله او ملاقادر لنګ وژل شوي، خو وايي، دى نه پوهېږي چې دغه کسان چا وژلي دي.
دى وړمه ورځ د وسلوالو طالبانو ترمنځ په ياده سيمه کې نښته هم تاييدوي او وايي چې په دې نږدې دوه ساعته نښته د مرګ ژوبلې په اړه معلومات نه لري.
هغه وايي، وسلوال طالبان اوس په دې ولسوالۍ کې دومره پياوړي شوي چې په خپل تشکيل کې ولسوال، امنيه قوماندان او نور ټاکي.
د سرچينې د څرګندونو له مخې، په سيمه کې د وسلوالو طالبانو شتون د دې لامل کېږي، چې د هغوى او امنيتي ځواکونو ترمنځ نښتې رامنځته او سيمه نا امنه شي.
ده له دولته وغوښتل چې په سيمه کې د امنيت د ټينګښت لپاره اړينې هڅې وکړي.
د يادې سيمې يو بل اوسېدونکى ميراجان هم په دې ولسوالۍ کې د طالبانو خپل منځي اختلاف او وسلواله نښته تاييدوي او وايي، تمه لري دغه اختلافات د دې لامل شي چې وسلوال طالبان له سيمې ولاړ شي او هلته امنيت ټينګ شي.
خو د طالبانو وياند ذبيح الله مجاهد د طالبانو تر خپل منځ نښته او هر ډول اختلاف په کلکه ردوي او بې بنسټه تبليغات يې بولي.
هغه وايي، چې ملاعزت الله د دولتي ځواکونو له خوا وژل شوى دى.
د ده په وينا، د ملاقادر لنګ په نوم کوم طالب په ياده ولسوالۍ کې نه دى وژل شوى.
