توکيو (پژواک ۱۸ چنګاښ ٩١): په توکيو ښار کې د افغانستان د راتلونکي په اړه نړيوال کنفرانس ته د چاپان صدراعظم یووشيهيکو نوډا (Yoshihiko Noda) په خپله پرانيستونکې وينا کې له ۲۰۱۴ کال وروسته د خپل هېواد او د نړيوالو مرستو ژمنه وکړه.
نوموړي په خپله وينا کې وويل، چې د يوه وران شوي هېواد بيارغونه نړيوالو مرستو ته اړتيا لري او له بهرنيو مرستو پرته افغانستان نه شي کولی چې له کورنيو ستونزو سره مبارزه وکړي.
د چاپان لومړي وزير وويل، چې مالي ژمنې د متقابل اعتماد او متقابلو ژمنو په ترڅ کې ترسره کېږي او له دغه فرصت څخه بايد د وسلوالو جنګياليو په ګډون ټول افغانان ګټه واخلي.
نوډا پر افغان حکومت غږ وکړ، چې بايد پر خپله هم د ښې حکومتوالۍ له لارې پر خپلو لاسونو د افغانستان بيارغونه يقيني کړي، نړيواله ټولنه له دوی سره ولاړه ده، څو له ۲۰۱۴ کال وروسته خپل امنيت په خپله وساتي.
د چاپان صدراعظم په افغانستان کې د تېرو لسو کلونو پر مهال پر شوو پرمختګونو خوښي څرګنده ګړه او ويې ويل، چې د افغانستان خلکو په تېرو درېيو لسيزو کې ډېر دردونه او کړاوونه ګاللي، خو اوس يې د سولې لاره پيل کړې ده.
ده وويل: ((د ملت جوړونې په پروسه کې ډېر پرمختګ شوی او افغانستان اوس يو داسې پړاو ته رسېدلی، څو د امنيت چارې پر خپله پر غاړه واخلي.))
نوموړي د افغانستان پر وړاندې د پرتو ګواښونو په یادونې سره وويل، په دې کې هېڅ شک نشته چې په تېرو لسو کلونو کې د افغانستان د بيارغونې لپاره چاپېريال او شرايط برابر شوي دي.
ده وويل: ((موږ د سولې او هيله منديو ډېرې نښې او ژمنې وينو، ترڅو د بيارغونې ګلونه وکرو.))
هغه زیاته کړه، چې دغه کنفرانس د دې لپاره جوړ شوی چې ټول مرسته کوونکي يو ځل بیا د افغانستان د بيارغونې ژمنې تازه کړي.
ده وويل، جاپانيان ځکه د نړيوالې بيارغونې ډېره لېوالتيا لري؛ په دويمه نړيواله جګړه کې چې جاپان په کومه ګنډواله بدل شوی و، د چاپان له جګړې وروسته اقتصادي پرمختګ د نړۍ د هېوادونو له مرستي پرته امکان نه درلود.
د توکيو په کنفرانس کې به د لېږد د بهير پاتې موده (د ٢٠١٤ زېږديز کال تر پايه) او له هغې وروسته د بدلون په لسيزه کې (له ٢٠١٥ تر ٢٠٢٥ زېږديز کال پورې) له افغانستان سره د نړيوالې ټولنې سياسي او مالي ملاتړ خپل کړي.
د توکيو د کنفرانس طرحه او ستراتيژي دا ده، چې د بدلون په لسيزه کې افغانستان پر خپل ځان بسيا شي.
د دغه کنفرانس سمبالوونکي وايي، چې د افغان حکومت له خوا نړيوالې ټولنې ته د متقابلې حساب ورکونې او ښې حکومتوالۍ ژمنې ورکول کېږي.
Views: 6
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن