کابل ( پژواک ١٤ زمرى ٩١ ) : د ولسمشرۍ ماڼۍ وايي ،چې د اساسي قانون د دوه نويمې مادې له مخې ، د وزيرانو سلب صلاحيت کول د پارلمان دنده ده.
د ولسمشرۍ ماڼۍ دغه څرګندونې په داسې حال کې کوي، چې ولسي جرګې نن پر کونړ ولايت د پاکستانيو بريدونو په موضوع د ملي دفاع او کورنيو چارو وزيران استيضاح او هغوى يې سلب صلاحيت کړل.
د ولسمشر د ويندوى له دفتر څخه د زمري په ١٤مه، پژواک خبري اژانس ته په يوه رالېږل شوې خبرپاڼه کې راغلي، چې د اساسي قانون ددوه نويمې مادې په اساس د وزيرانو سلب صلاحيت کول د پارلمان دنده ده.
د اساسي قانون په دوه نويمه ماده کې راغلي دي : (( ولسى جرګه د خپلو غړيو د لسمې برخې په وړانديز كولاى شي، له هر يوه وزير څخه استيضاح وكړي. كه وړاندې شوې توضيح دقناعت وړ نه وي، ولسي جرګه د عدم اعتماد د رايې موضوع څېړي.له وزيرڅخه د عدم اعتماد رايه بايد صريحه، مستقيمه او پر پخو دلايلو ولاړه وي، دغه رايه د ولسى جرګې د ټولو غړيو د رايو په اكثريت صادرېږي.))
له ارګ څخه په خپره شوې خبرپاڼه کې راغلي، چې ولسمشر حامد کرزى به سبا د ملي امنيت د شورا له غونډې وروسته د يادو وزيرانو د سلب صلاحيت کېدو په اړه خپله پرېکړه اعلان کړي.
د ملي دفاع او کورنيو چارو وزيران، له پاکستان څخه پر افغانستان د راکټي بريدونو او په هېواد کې د نا امنيو له امله نن د ولسي جرګې له خوا استيضاح شول.
د پاکستان د پوځ له خوا له تېر شاوخوا يو نيم کال راهيسې د افغانستان پر کونړ او نورو سرحدي سيمو راکټي بريدونه کېږي، چې لسګونو تنو ته په کې تر اوسه مرګ ژوبله اوښتې ده.
يادو وزيرانو په دې اړه د ولسي جرګې د غړيو پوښتنې ځواب کړې، خو ددوى ځوابونه د وکيلانو د قناعت وړ نه و او هغوى ته يې د رايو صندوقونه کېښودل.
د ولسي جرګې له ٢٤٦غړيو څخه ٢٢٨ تنه په نننۍ غونډه کې حاضر وو.
د وکيلانو د رايو په پايله کې د ملي دفاع وزير ستر جنرال عبدالرحيم وردګ وردګ د ١٤٦ مخالفو او ٧٢ موافقو رايو په لرلو سره ونه شواى کولى، چې د ملي دفاع د وزير په توګه پر خپله څوکۍ پاتې شي.
دغه راز په دې رايه اچونه کې د کورنيو چارو وزير بسم الله خان محمدي د ١٢٦ مخالفو او ٩٠ موافقو رايو په لرلو سره ونه شواى کولى، چې پر څوکۍ د پاتې کېدو لپاره د جرګې د حاضرو غړيو ٥٠ سلنه جمع يو رايې خپلې کړي.
د يادو کسانو پاتې نورې رايې سپينې او يا باطلې وې.
د ولسي جرګې مشر له ولسمشر حامد کرزي څخه وغوښتل، چې د يادو وزارتونو لپار وړ کسان ژر ولسي جرګې ته د اعتماد د رايې د ترلاسه کولو په موخه ور معرفي کړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن