کابل(پژواک١٠مرغومي٩١): د مشرانو جرګې د شکايتونو مشر وايي،چې د ننګرهار يوشمېر اوسېدونکو ورته شکايت کړى، چې د ولسي جرګې په لومړي مرستيال پورې تړلو وسلوالو په ننګرهار کې ددوى شاوخوا ٥٠٠ جريبه ځمکه غصب کړې ده.
د مشرانو جرګې د شکايتونو د اورېدو کمېسيون مشر زلمي زابلي دا څرګندونې د مرغومي په لسمه، ددې جرګې په عمومې غونډه کې وکړې.
هغه زياته کړه،چې نن سهار د ننګرهار ولايت د سرخردو ولسوالۍ ٤٠ تنه اوسېدونکي ياد شوي کمېسيون ته ورغلي وو او دعوه يې کوله ، چې د ملک نواب په نوم د وسلوالو يو قوماندان ، چې له حاجي عبدالظاهر قدير سره تړاو لري، د يادې ولسوالۍ په خيراباد سيمه کې د دوى پر ځمکو پوسته اچولې ده.
د زابلي په وينا، يادو کسانو کمېسيون ته د ٤٧٠ جريبه ځمکې شرعي قباله ورښودلې او وايي چې نواب دوى د همدې ځمکو کرلو او يا پر هغې د کورونو جوړولو ته نه پرېږدي.
دى وايي، چې دغو خلکو د ننګرهار ولايتي چارواکيو ته هم شکايت کړى، خو هېچا ورته پام نه دى کړى.
د زابلي په وينا ، ياد کسان دا هم وايي، چې څه د پاسه ٤٠٠٠ جريبه نوره ځمکه هم، د دولت د ملکيت په نوم د حاجي ظاهر وسلوالو لاندې کړې ده.
د مشرانو جرګې د شکايتونو د اورېدو د کمېسيون مشر پژواک ته وويل، چې ددې اونۍ په وروستيو کې به د مشرانو جرګې يو پلاوى د موضوع د څېړلو لپاره ننګرهار ته لاړ شي.
پژواک اژانس هڅه وکړه، چې په دې اړه د ولسي جرګې د مرستيال حاجي ظاهر قدير نظر واخلي، خو هغه سره په اړيکه نيولو بريالى نه شو.
خو د ننګرهار د والي وياند احمد ضياء عبدالزي پژواک اژانس ته له دې کار څخه ناخبري وښوده او زياته يې کړه ، چې تر اوسه ورته چا په دې اړه شکايت نه دى کړى.
هغه زياته کړه، چې د ځمکو د غصب موضوع مهمه ده او که چېرې خلک ورته شکايت وکړي، نو ولايت به يې په اړه جدي اقدامات وکړي.
