کابل (پژواک، ٢١ مرغومى ٩١): وسلوالو طالبانو په کابل کې د علماوو د جوړېدونکې غونډې په اړه له ديني عالمانو غوښتي، چې په دې ناسته کې ګډون ونه کړي.
د وسلوالو طالبانو د وياند ذبيح الله مجاهد له لوري پژواک خبري اژانس ته په رالېږل شوې خبرپاڼه کې راغلي، ياده غوښتنه په دې وروستيو کې د هېواد د بېلابېلو سيمو شاوخوا ٣٠٠ کسانو د يوه پرېکړه له لارې کړې ده.
خو په خبرپاڼه کې دا نه دي ويل شوي، چې دا غوښتنه د کومو عالمانو له خوا چېرته او څه وخت شوې ده.
په ياد پرېکړه ليک کې چې يوه کاپي يې پژواک ترلاسه کړې، د اسلامي امت او په ځانګړې توګه د افغانستان له ديني عالمانو د دې غونډې د تحريم غوښتنه شوې ده.
ټاکل شوې، د افغانستان حکومت په راتلونکې مياشت (سلواغې) کې ياده غونډه راوبلي.
طالبان ادعا کوي، ياد کنفرانس د دې لپاره جوړېږي، ترڅو امريکا خپلو ځينو موخو ته په کې ورسېږي.
