جلال اباد (پژواک ١٤ ورى ٩٢): په لغمان ولايت کې د وسله والو مخالفينو د مشهور قوماندان نبي مرستيال له خپلو شپږو ملګرو سره د سولې له پروسې سره يوځاى شو.
د لغمان والي ډاکټر فضل الله مجددي د وري په ١٥مه پژواک خبري اژانس ته وويل، چې په لغمان ولايت کې د کوېټې شورا اړوند د مشهور قوماندان مرستيال، دولت مير له خپلو شپږو نورو ملګرو سره د سولې له روان بهير سره يو ځاى شوى دى.
هغه زياته کړه، چې ياد قوماندان او ملګرو يې د الينګار ولسوالۍ په بېلابېلو سيمو کې ورانکارې کړنې ترسره کولې.
هغه وويل، چې دغه کسان د ملي اردو د ځواکونو په هڅو د سولې له پروسې سره يوځاى شوي دي.
مجددي وايي: ((ټولو مخالفينو ته مې پيغام دا دى، چې نور دې سوله وکړي.))
د لغمان والي زياته کړه، چې په نږدې وختونو کې به په لسګونه نور وسله وال هم د سولې له پروسې سره يوځاى شي، چې په يو ځاى کېدو سره به يې په لغمان کې امنيت لا ښه شي.
د لغمان د سولې د ولايتي کمېټې رييس حاجي محمدعمر وايي، چې يادو وسله والو د سولې کمېټې ته اوه ډوله بېلابېلې وسلې هم سپارلي، چې وروسته به د سولې کمېټې له لوري ډاياک پروګرام ته وسپارل شي.
دى وايي، چې له دې لارې به يو شمېر نور وسله وال مخالفين هم د سولې له پروسې سره يوځاى شي.
د حاجي محمدعمر په خبره، هر هغه وسله وال، چې د سولې له بهير سره يوځاى کېږي، تر يوه کاله به يې قوماندان ته ١٣٠٠٠افغانۍ او غړو ته به يې د مياشتې ٨٠٠٠ افغانۍ تنخوا ورکوي او د دې تر څنګه به د بېلابېلو مسلکونو زده کړو ته هم ور وپېژندل شي.
د يوځاى شوې وسله والې ډلې قوماندان دولت مير پژواک اژانس ته وويل، چې پخوا يې ګڼې ورانکارې کړنې ترسره کولې، خو اوس پوه شوى چې دولت د دوى په ګټه دى او دوى د بل چا په اشاره جګړه کوله.
هغه زياته کړه: ((موږ ته ګاونډي هېواد پيسې راکولې او جنګ ته يې هڅولو.))
نوموړي د کوم هېواد نوم وانه خيست خو زياته يې کړه، چې له دې وروسته به پر يو شمېر نورو ملګرو هم کار وکړي، تر څو هغوى هم د سولې له بهير سره يوځاى کړي.
ياده دې وي، چې تر اوسه په لغمان کې ٣٠٠ تنه د سولې له پروسې سره يوځاى شوي دي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن