کندهار (پژواک ٢٥ غويى ٩٢): کندهار ولايت ته د ميوند د پېښې د څېړنې په موخه راغلى پلاوى وايي، چې دلته شوى لاريون د وسله والو مخالفينو له لوري پلان شوى و او د پوليسو د بې غورۍ له امله په تاوتريخوالي اوښتى و.
په ميوند ولسوالۍ کې دغه لاريون د غويي په ١٨مه وشو، چې وروسته په تاوتريخوالي واوښت او د پوليسو او لاريون کوونکو تر منځ په اخ و ډب کې ٢٠ کسانو ته مرګ ژوبله واوښته او هم په کې د دوو مخابراتي شبکو د انتنونو تر څنګ، د برېښنا يو شمېر پايې او دوکانونه وسوځول شول.
چارواکو هغه مهال ويل، چې لاريون د ګوشتې د پېښې په تړاو د پاکستان پر ضد شوى، خو وروسته معلومه شوه، چې لاريون د افغان او بهرنيو ځواکونو پر خلاف شوى و.
تر پېښې وروسته ولسمشر کرزي د دې موضوع د څېړلو امر وکړ او د دغه کار لپاره يې په قومي او قبايلي چارو کې د خپل سلاکار محمدصديق عزيز په مشرۍ يوه پلاوى وټاکه، چې په کې د لويې څارنوالى استازى ډګر جنرال عبدالسلام عصمت، د چارو د ادارې استازى تورن جنرال سيدرحيم سعيد، د کورنيو چارو وزارت استازى سمونوال هادي ګل، د ملي امنيت د لوى رياست استازى ډګروال ارشاد او د سيمه ييزو ارګانونو استازى عبدالمتين اقرار شامل دي.
ياد پلاوي ميوند ولسوالۍ ته تر سفر وروسته د غويي په ٢٥مه د کندهار ولايت مقام له رسنيو سره د اړيکو او معلوماتو په مرکز کې د خپلې څېړنې جزئيات ورکړل.
د پلاوي مشر محمدصديق عزيز وويل، چې په ميوند ولسوالۍ کې يې له خلکو او چارواکو د څېړنې په پايله کې معلومه کړه، چې لاريون د پاکستان پر ضد نه، بلکې د افغان او بهرنيو ځواکونو پر ضد شوى و.
هغه زياته کړه، د لاريون په پيل کې يو شمېر خلک په دې نيت له لاريون سره يو ځاى شوي وو، چې ګواکې د ګوشتې د پېښې له امله د پاکستان پر ضد پلان شوى دى.
دى وايي، د خلکو د خبرو او معلوماتو پر بنسټ داسې ښکاري، چې دغه لاريون د وسله والو مخالفينو له لوري پلان شوى و او خلک يې هڅولي وو، چې د افغان او بهرنيو ځواکونو خلاف په دغه لاريون کې برخه واخلي.
له سيمې څخه د خپروو شوو راپورونو پر بنسټ داسې هم ويل کېدل، چې دغه لاريون د افغان او بهرنيو سرتېرو له خوا ماشومانو او مېرمنو ته د سپکاوي له امله شوى دى.
خو عزيز دا خبره په کلکه رد کړه او ويې ويل، چې افغان او بهرنيو ځواکونو يواځې په ځينو کورونو کې تلاشي کړې او د خپلو څېړنو په اوږدو کې يې داسې څه نه دي موندلي، چې ګواکې هغوى دې مېرمنو ته سپکاوى کړى وي.
نوموړي د ميوند پر سيمه ييزو چارواکو نيوکه وکړه، چې د بې غورۍ او نه څارنې له امله يې دغه لاريون پر تاوتريخوالي اوښتى دى.
هغه زياته کړه: ((مخالفينو خلک هڅولي، چې د بهرنيو ځواکونو پر ضد لاريون وکړي، خو پوليسو غفلت کړى، د لاريون څارنه يې نه ده کړې، چې بالاخره يې پرې کنټرول له لاسه ورکړ او لاريون په تاتريخوالي واوښت.))
د نوموړي په وينا، که لاريون په سمه توګه تنظيم شوى واى، نو مخالفينو نه شواى کولاى، چې د لاريون منځ ته لاره پيدا کړي او خلک مجبور کړي، چې په تاوتريخوالي لاس پورې کړي.
هغه وويل، د څېړنو پر مهال يې دا هم وموندله، چې د دغه لاريون پر مهال ٥ ملکي وګړي وژل شوي او د ١٢ په شاوخوا کې نور ټپيان شوي دي.
خو هغه يادونه وکړه، چې د لاريون پر مهال په شوي تاوتريخوالي کې مرګ ژوبله ډېره وه او کېداى شي پاتې کسان مخالفين او يا هم پوليس وي.
چارواکي وايي، چې د دې پېښې په تړاو يې نږدې دېرش تنه شکمن وګړي نيولي چې په تاوتريخوالي تورن دي، له هغوى څخه پلټنې دوام لري، چې پايلې به يې وروسته په ډاګه شي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن