کندوز (پژواک ٣ کب ٩٢): د کندوز ولايت په خان اباد ولسوالۍ کې درې پوليس د يوې چاودنې له امله، چې د راتلونکو ټاکنو د امنيت لپاره يې عمليات تر سره کول، وژل شوي او دوه نور پوليس او يو ملکي وګړى په کې ټپيان شوي دي.
د خان اباد ولسوال حيات الله اميري وايي، دغه ماين نن ماسپښين شاوخوا يوه بجه د ايشان توپ په سيمه کې د پوليسو مخې ته چاودلى دى.
هغه پژواک خبري اژانس ته وويل، چې په دې چاودونه کې درې پوليس وژل شوي او دوه نور ټپيان دي.
خو د کندوز د امنيه قوماندانۍ مطبوعاتي مسوول سيد سرور حسيني وايي، په دې پېښه کې يو ملکي وګړى هم ټپي شوى دى.
حسيني زياته کړه، نن سهار يې په خان اباد ولسوالۍ کې د ټاکنيزو مرکزونو د امنيت د ټينګښت په موخه چاڼيز عمليات پر لاره اچولي و او دغه ماين هغه مهال وچاودېد، چې پوليس د ملي امنيت او اردو ځواکونو سره په ګډه پر عملياتو بوخت وو.
د هغه په وينا، تر دې مهاله د ايشان توپ کلي په ګډون پنځه کلي د وسله والو مخالفينو له شتون څخه پاک شوي دي.
سيمه ييز چارواکي وايي، تر دې مهاله نه ده څرګنده، چې دغه ماين به د چا له لوري ځاى پر ځاى شوى وي.
خو د طالبانو وياند ذبيح الله مجاهد وايي، دوى دغه ماين ته له لرې چاودنه ورکړې او په پايله کې يې شپږ پوليس وژل شوي او څلور نور ټپيان دي.
