کابل (پژواک ١٠ کب ٩٢): د کونړ ولايت امنيتي مسوولين وايي چې د بهرنيو ځواکونو په يوه بې پيلوټه هوايي بريد کې پنځه وسله وال وژل شوي دي.
د کونړ امنيه قوماندان مل پاسوال عبدالحبيب سيدخېل د کب په ١٠مه پژواک خبري اژانس ته وويل، چې دغه بريد پرون مازديګر د غازي اباد په تشيګل سيمه کې شوى دى.
هغه زياته کړه، چې په بريد کې د عبدالرحمن په نوم د وسله والو يوه قوماندان چې په خبيب مشهور و، له خپلو څلورو ملګرو سره وژل شوى دى.
د سيدخېل په وينا، چې په دغو عملياتو کې ولسي وګړو ته مرګ ژوبله نه ده اوښتې.
وسله والو طالبانو تر اوسه د دغه بريد په اړه څه نه دي ويلي.
د يادونې ده، چې تېره اونۍ په غازي اباد ولسوالۍ کې د وسله والو په يوه بريد کې د ملي اردو ٢٠ سرتېري ووژل شول.
