د هلمند امنيه قوماندانۍ کې د ښځينه پوليسو مديريت رامنځته شو

لښکرګاه(پژواک، ۵ غبرګولى۹۳): په هلمند کې د لومړي ځل لپاره د امنيه قوماندانۍ د جنايي څېړنو رياست په چوکات کې  د ښځينه پوليسو مديريت رامنځته شو.

د هلمند امنيه قوماندان پاسوال اركانحرب عبدالقيوم باقي زوى دغبرګولي په ۵ مه په دې اړه جوړې شوې غونډه کې وويل، د نوي رامنځ شوي مديريت لپاره يې د دويم څارن ملالۍ په نامه يوه پوليس افسره د مديرې په توګه وټاکله.

قوماندان وايي، چې په دې مديريت کې د دغې مديرې په ګډون شاوخوا لس نورې ښځينه پوليسې هم دنده تر سره کوي.

نوموړي زياته کړه، چې دغه مديريت  د کورنيو چارو وزارت  په منظورۍ رامنځ ته شوى، د ښځو پر وړاندې د تاوتريخوالي تر څنګ به نورې ډېرې پېښې د ښځينه  پوليسو له لوري څېړل کېږي.

د ياد مديريت لپاره ګومارل شوې افسرې ملالۍ خبريالانو ته وويل، ورسپارل شوې دنده به په سمه  توګه تر سره کړي.

هغه وايي، په اړوند مديريت کې د تحقيقاتو د رياست  په چوکاټ کې ټولې اسانتياوې برابرې شوې دي.

دې وويل، چې دغه مديريت به د ښځينه پوليسو په جلب او جذب کې هم ډېره هڅه وکړي.

Views: 0