په لغمان کې دوه پوليس د خپلو ملګرو له خوا وژل شوي

جلال اباد ( پژواک، ٥ غبرګولى ٩٣ ) : د لغمان په بادپښ ولسوالۍ کې دوه  سيمه ييز پوليس د خپلو ملګرو له لوري وژل شوي دي.

د لغمان د والي وياند سرحدي ځواک د غبرګولي په ٥مه پژواک خبري اژانس ته وويل ، چې دا پېښه تېره شپه په دوه نيمو بجو د يادې ولسوالۍ د حافظ کمره په سيمه کې رامنځته شوې وه.

هغه زياته کړه، څلورو سيمه ييزو پوليسو چې له وسله والو مخالفينو سره لاس يو ځای کړی و ، خپل دوه ملګري پوليس وژلي او په خپله په تېښته بريالي شوي دي.

د نوموړي په وينا، د پېښې په تړاو تر اوسه څوک نه دي نيول شوي، خو پلټنې دوام لري.

د سيمې يوتن اوسېدونکي غلام نبي پژواک اژانس ته وويل، چې وژل شوي پوليس د مرکز اړوند سيمو اوسېدونکي وو او تښتېدلي پوليس د بادپښ ولسوالۍ اوسېدونکي دي.

ده زياته کړه ، چې تښتېدليو پوليسو له ځانه سره د پوستې ټول مهمات اووسلې هم وړي دي.

ددولت وسله والو مخالفينو تراوسه په دې اړه څه نه دي ويلي