زابل کې چاودنې ٣ پوليس او ٩عام وګړي ټپيان کړل

کلات (پژواک، ٢١ غبرګولى ٩٣ ) : د زابل په شاه جوى ولسوالۍ کې د يوې چاونې له امله درې پوليس او ٩ ملکي وګړي ټپيان شوي دي.

ددغه ولايت د عامې روغتيا رييس ډاکټر لعل محمد توخي د غبرګولي په ٢١مه، پژواک خبري اژانس ته وويل ، چې دا چاودنه پرون غرمه مهال د شاه جوى ولسوالۍ په بازار کې د سيمه ييزو پوليسو پر موټر شوې وه.

هغه زياته کړه، چې په دې چاودنه کې درې سيمه ييز پوليس او ٩ عام وګړي ټپيان شوي دي.

د نوموړي په وينا، په ټپيانو کې درې ښځې هم شاملې دي ، ټپيان روغتون ته لېږدول شوي او د هغوى روغتيايي حالت د ډاډ وړ ښودل شوى دى.

بله خوا ددې ولايت امنيتي چارواکي وايي، چې د ولسمشريزو ټاکنو د دويم پړاو ټاکنو د خونديتوب لپاره يې پراخ امنيتي تدابير نيولي، تر څو ددې ولايت اوسېدونکي وتوانيږي، چې د ټاکنو مرکزونو ته ولاړ شي او رايه ورکړي .

ددې ولايت امنيه قوماندان مل پاسوال غلام سخي روغ ليوني پژواک خبري اژانس ته وويل ، چې درې ګونو افغان امنيتي ځواکونو د ټاکنو د امنيت لپاره ښه پلانونه جوړ کړي او اوس يې په عملي کولو بوخت دي .

نوموړى وايي ، په هغو سيمو کې چې د وسله والو مخالفينو د بريدونو ګواښ موجود دى ، دوى لنډ مهاله عمليات ترسره کوي، تر څو سيمې امن شي .

روغ ليوني وويل، د دولت وسله وال مخالفين چې د ټاکنو په لومړي پړاو کې په ګډوډۍ ونه توانيدل دا ځل خپل ټول کوښښ کوي، چې ټاکنې ګډې وډي کړي، خو زياتوي چې دوى يې پر وړاندې امنيتي تدابير لري.

Views: 0