غزني (پژواک، د چنګاښ لومړۍ نېټه ٩٣): په غزني کې د هغې وسله والې ډلې په ګډون ٢٦ طالبان وژل شوي، چې له پاکستانه يې د جنګياليو او وسلو د را اړولو مسووليت درلود.
ولايتي چارواکي وايي، دغه وسله وال طالبان، چې پاکستانيان هم په کې دي، د ناوې او مقُر په ولسواليو کې وژل شوي او ١٤ نور ملګري يې ټپيان شوي دي.
د غزني د والي مرستيال محمدعلي احمدي پژواک خبري اژانس ته وويل، چې تېره شپه افغان پوځيانو د دې ولسوالۍ د ″قبرغې″ په سيمه کې د يوې وسله والې نښتې پر مهال د طالب قوماندان ملا قدير په ګډون ١٤ طالبان ووژل شول.
احمدي وايي، دې وسله والې ډلې له پاکستانه غزني ته د وسله والو او وسلو د لېږد رالېږد مسووليت پر غاړه درلود.
د والي مرستيال د دې نښتې د څرنګوالي په تړاو ډېر څه ونه ويل خو زياته يې کړه، چې د مقُر په ولسوالۍ کې بيا په جګړه کې ١٢ وسله وال وژل شوي او ١٤ نور ټپيان دي.
احمدي وويل، تېره شپه طالبانو د يادې ولسوالۍ د ″لال خېلو″ په سيمه کې د سيمه ييزو پوليسو پر پوستو بريد وکړ ، خو دغو پوليسو يې تر بريد مخکې د پلان په اړه معلومات درلودل.
ده وويل، چې په دغه بريد کې سيمه ييزو پوليسو ته مرګ ژوبله نه ده اوښتې.
وسله والو طالبانو تر اوسه د دغو پېښو په تړاو څه نه دي ويلي.
