غزني ښار (پژواک ٢ تله ٩٣) : چارواکي وايي چې ناپېژانده کسانو د غزني ولايت د ترانسپورت امر تښتولى دى.
د دغه ولايت د والي وياند شفيق الله ننګ پژواک خبري اژانس ته وويل چې د تراسپورټ امر احمدولي وړمه شپه تښتول شوى خو د تښتولو سيمه يې نه ده معلومه.
ننګ وويل چې د احمدولي کور ته څو ملګري ورغلي؛ هغه يې د چکر په پلمه له ځان سره بيولى او تښتولى دى.
د والي وياند زياته کړه چې تر اوسه د تښتوونکو ځاى او هويت نه دى معلوم .
بلخوا د غزني د امنيې قوماندانۍ د امنيت امر سمونوال اسدالله انصافي پژواک ته تاييد کړه چې د دغه ولايت د ترانسپورټ امر ناپېژانده کسانو تښتولى دى.
د انصافي په وينا چې د پېښې د څرنګوالي په اړه معلومات نه لري خو پوليسو څېړنې او پلټنې پيل کړې دي.
تر اوسه کومې ډلې د دې پېښې مسووليت نه دى اخيستى.
په تېرو څو اوونيو کې دا دويمه پېښه ده چې د غزني ولايت جګپوړي مامورين تښتول کېږي.
تر دې مخکې د چارواکو په وينا، وسله والو طالبانو د دغه ولايت د حج او اوقافو رييس تښتولى وو چې دوه ورځې وروسته يې په ميدان ورګو ولايت کې مړ وموندل شو.
