کندهار ښار ( پژواک، ١٩ تله ٩٣ ) : په کندهار ښار کې ديوې چاودنې له امله يو تن مړ او درې نور ژوبل شوي دي.
د والي وياند صميم خپلواک د تلې په ١٩مه، پژواک خبري اژانس ته وويل چې دا چاودنه نن مازيګر ناوخته د کندهار ښار ددرېيمې ناحيې اړونده د مستريانو په سراى کې شوې ده.
هغه زياته کړه، چې په ياد سراى کې د اکسيجن يوه ډبه چاودېدلې، چې له امله يې يو مستري مړ او درې نور کسان ژوبل شوي دي.
د خپلواک په وينا، ټپيان شخصي روغتون ته لېږدول شوي، خو د هغوى د روغتيايي حالت په اړه يې معلومات نه درلودل .
د ناصر په نامه د پېښې يوه عيني شاهد پژواک اژانس ته وويل چې د ګرمۍ له امله ياده ډبه چاودېدلې ده ده.
دى وايي چې ژوبل کسان د ياد مستري شاګردان وو او د هغوى روغتيايي حالت هم ډېر ښه نه و.
ديوه بل خبر له مخې، نن تر غرمې وروسته په ژېړۍ ولسوالۍ کې ديوې چاودنې له امله دوه پوليس ټپيان شوي دي.
