لښکرګاه-سرپل (پژواک ١٧ لړم ٩٣): په هلمند ولايت کې د موټربم په چاودنه کې څلور وسله وال طالبان وژل شوي دي.
د دغه ولايت د امنيې قوماندانۍ وياندسمونيار فريداحمد عبيد د لړم په ١٧مه پژواک خبري اژانس ته وويل چې دا پېښه نن غرمه د ولايت د مرکز لښکرګاه ښار اړوند د مخطر کلا په سيمه کې رامنځته شوې ده.
هغه زياته کړه چې په ياده سيمه کې د وسله والو طالبانو په هغه موټر کې چاودنه شوې او له منځه تللى چې غوښتل يې په لښکرګاه کې يې والوځوي.
عبيد وايي چې د موټربم په دې چاودنه کې څلور وسله وال وژل شوي او يو شمېر نور ژوبل شوي دي.
وسله والو طالبانو تر اوسه په دې اړه څه نه دي ويلي.
د يو بل خبر له مخې، په سرپل کې وسله والو طالبانو اوه ملکي وګړي له دولت سره د همکارۍ په تور نيولي دي.
د دغه ولايت د ولايتي شورا سرپرست اسدالله دانش پژواک اژانس ته وويل چې وسله والو مخالفينو ياد کسان د کوهستاناتو ولسوالۍ د صفک په کلي کې نيولي دي.
نوموړي له وسله والو مخالفينو وغوښتل چې ياد کسان ژر تر ژره خوشي کړي.
خو د سرپل د امنيې قوماندانۍ د امنيت امر سمونمل عنايت الله حبيبي د يادو کسانو له نيول کېدو بې خبري وښوده.
هغه پژواک خبري اژانس ته ومنله چې په ياده سيمه کې وسله وال شتون لري.
بلخوا د دغه ولايت په ګوسفندي ولسوالۍ کې يوه پلار خپل لور له دې امله وژلې چې ګواکې نامشروع حمل يې اخيستى و.
د امنيت امر حبيبي وايي چې پوليسو د يادې نجلې پلار او ماما نيولي او ترې پلټنې پيل شوې دي.
هغه دغه راز وويل چې پرون په کوهستانات ولسوالۍ کې د ماين په يوه چاودنه کې د يوه اووه کلن ماشوم يوه پښه پرې شوې ده.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن