لښکرګاه (پژواک ۳ لېندۍ ۹۳): په هلمند ولايت کې د نشه يي توکو قاچاق کوونکي، مافيايي کړۍ او وسله وال د سولې پروسې پر وړاندې ستر خنډونه دي.
دا څرګندونې د لېندۍ په ٣مه د هلمند سرپرست والي په لښکرګاه کې د سولې د دوه ورځني نندارتون د پرانيستې په مراسمو کې وکړې.
په نندارتون کې د معلولو انځورګرو له لوري سلګونه اثار نندارې ته وړاندې شوي دي.
د هلمند سرپرست والي تورن جنرال محمدنعيم خبريالانو ته وويل، د دغه نندارتون د پرانيستلو موخه د جګړې پر وړاندې مبارزه ده.
نوموړي وويل: ((دلته د سولې پروسې د ټکنيتوب لاملونه مافيايي کړۍ، د نشه يي توکو قاچاق، د وسله والو طالبانو له لوري د کانونو قاچاق او په خپله وسله وال دي.))
د هلمند د سولې شورا د دارالانشاء رييس انجنير محمد داود فرهنګ وويل چې دغه د سولې لپاره مثبت پيغامونه لري.
ده زياته کړه هغه ځوانانو چې د مالي امکاناتو لپاره جنګ کوي، د دغه نندارتون له لارې ورته ښکاره پيغام وړاندې کېږې چې راشي او په سوله کې کار وکړي.
فرهنګ وويل ، هڅه کوي هغه ځوانان راجلب کړي چې د وسله والو طالبانو په ليکو کې دي.
په کابل کې د معلولينو د اجتماعي مرکز استازي او د ياد نندارتون مسوول عبدالله پژواک ته وويل چې د دغه پروګرام مالي لګښت په کابل کې د برېتانيا سفارت ورکړى دى.
د ده په وينا، په ياد نندارتون کې ۴۰ تابلوګانې چې د جنګ سولې، امنيت او نور ورته انځورونه په کې وړاندي شوي دي، په ليدو سره يې د سولې پيغام تر خلکو لېږدول کېږي.
د هلمند پوهنتون يوه محصل حکمت الله پژواک ته وويل، دغه هنر له يوې خوا خلکو ته ښه پيغام وړاندې کوي او له بلې خوا ځوانان کار ته هڅوي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن