جلال اباد (پژواک، ١٢ لېندۍ ٩٣): د ننګرهار ولايت د عامې روغتيا د ملکي روغتون لپاره نوې عاجله خونه پرانيستل شوه.
د ننګرهار د عامې روغتيا رييس ډاکتر نجيب الله کامه وال د لېندۍ په ١٢مه د عاجلې څانګې د پرانيسې په مراسمو کې وويل چې پر يادې خونې شاوخوا شپږنيم ميليونه افغانۍ لګښت راغلى چې د ملګرو ملتونو د اوچا موسسې له لوري ورکړل شوى دى.
هغه زياته کړه چې د يادې بېړنۍ څانګې ټولې چارې د دوو مياشتو په موده کې بشپړې شوې چې نن ګټې اخيستنې ته وسپارل شوې.
نوموړي وويل: ((دغه بېړنۍ خونه ٢٠ بيسترونه لري چې د ښځو او نارينه و څانګې يې جلا دي او اړوند ملحقات هم لري.))
دى وايي چې د يادې خونې په جوړېدو سره به د عامې روغتيا د ملکي روغتون هغه ستونزې چې پخوا يې د عاجلو ناروغانو په برخه کې لرلې حل شي.
د نوموړي په خبره چې ياده عاجله خونه په نوې او عصري وسايلو سنباله ده چې له مخې به يې ستونزې راکمې شي.
د ننګرهار والي مولوي عطاءالله لودين د يادې خونې په پرانيستې خوښي څرګنده کړه او ويې ويل چې د عامې روغتيا په حوزوي روغتون کې د عاجلې خونې په جوړېدو سره به د ستونزو په کچه کې کمښت راشي.
ياده دې وي چې د ننګرهار حوزوي روغتون يو له هغو روغتونونو دى چې د هېواد د ختيځو ولايتونو ډېرى ناروغان ورته راځي.
Views: 2
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن