د کندهار د کرنې رياست د مسلکي کدرونو له کمښت سره مخ دى

کندهار(پژواک ، ليندۍ لومړۍ نېټه ٩٤): د کندهار د کرنې او مالدارۍ رياست د مسلکي کدرونو له کمښت سره مخ دى،چې له امله يې دنباتي افاتو او امراضودمخنيوي چارې له خنډ سره مخامخ  کړې دي.

د ياد رياست رييس انجنير احمد شاه روشن وايي، څو ځله يې مرکزي ادارې ته د رياست په اډانه کې د مسلکي کدرونو د ګومارلو وړانديزونه کړي، خو لا هم منل شوي نه دي.

هغه زياته کړه،چې کندهار د هېواد په کچه يو زراعتي ولايت دى چې له مخې يې بايد اړوند رياست ډېر فعال و اوسي او د خلکو د ستونزو د حل په موخه لازمې اسانتياوې ولري.

روشن پژواک خبري اژانس ته وويل ، کندهار چې د بېلابېلو کرنيزو محصولاتو تر څنګ په کې انګور او انار ډېر دي، ډېر مهال د ځينو افاتو او امراضو له امله زيانمن کېږي او د کرنې رياست اوسنى تشکيل يې د مخنيوي توان نه لري.

د ده په خبره، که د کندهار د کرنې په رياست کې له اړتيا سره سم مسلکي کدرونه په دندو وګومارل شي، نو د نباني امراضو او افاتو د مخنيوي لارې چارې به چټکې شي.

نوموړي په کندهار کې د نباتي کلينيک نشتوالى هم يوه ستونزه ياده کړه او ويې ويل چې د هغوى او ولايت له پرله پسې هلو ځلو وروسته وزارت ژمنه کړې، چې په دې ولايت کې به نباتي کلينيک پرانيزي.

خو روشن وويل چې له بېلابېلو ستونزو سربېره يې د کندهار لپاره دويم سل ورځنى پلان جوړ کړى، څو د شته امکاناتو په چوکاټ کې خلکو ته غوره خدمات وړاندې شي.

د کندهار د کرنې او مالدارۍ رييس څرګنده کړه، د کندهار د بېلابېلو ولسواليو ٢٠٠ بزګرو او ګروندګرو ته به هره اوونۍ د نباتي امراضو او افاتو دمخنيوي لارې چارې ورزده کړي اوپه دې توګه به هغوى وهڅوي، چې پروخت د خپلو کرنيز توکو د امراضومعلومول او مخنيوى وکړاى شي.

د دې تر څنګ نوموړي يادونه وکړه، چې ډېر ژر به د کندهار په سپين بولدک، ارغستان، تخته پُل، معروف، خاکرېز، ډنډ او دامان کې د غنمو اصلاح شوى تخم ووېشي، چې په دې توګه به په دغو ولسواليو کې نه يوازې د غنمو حاصلات زيات شي، بلکې د تخم په توليد کې به هم ډېروالى راشي چې بيا به په نورو ولسواليو کې هم ورڅخه کار واخيستل شي.

دکندهاردکرنې اومالدارۍ رييس دغه رازوويل، چې په دې موده کې په دانارو د ارزونې چارې هم ترسره کړي، ترڅو د يادې شوې مېوې غوره جنس معلوم او تر لاسه شي.

نوموړي زياته کړه، چې څو ورځې وړاندې يې د سوداګرۍ خونې په مرسته د بېلابېلو ولايتونو له سوداګرو سره يوه غونډه لرله، چې د کندهار د انارو ٧٧ ډولونه په کې وړاندې شول او له دې ډلې اته ډولونه انتخاب شول، چې نه يوازې د امراضو پر وړاندې يې مقاومت زيات دى، بلکې د دې وړتيا لري چې بهرنيو مارکېټونو ته صادر شي.

د کرنې رييس د نيالګو د روزنې په اړه وويل چې په دويم سل ورځني پلان کې دا هم شامل دي، چې اړوند رياست به د خپلو ١٢ هغو شنو خونو څارنه کوي چې نيالګي په کې کرل شوي دي.

login or register a new account.