د لغمان د ولايتي شورا رييس ټپي او يو ساتونکى يې و وژل شو

مهترلام (پژواک، ١٤ زمرى ٩٥): د لغمان د ولايتي شورا رييس له اتو نورو کسانو سره په يوه چاودنه کې ټپي او يو ساتونکى يې وژل شوى دى.

د لغمان د والي وياند سرحدي ځواک د زمري په ١٤مه پژواک خبري اژانس ته وويل چې دا چاودنه نن سهار شاوخوا اته بجې د مهترلام ښار اړوند د سراج له بڼ سره نږدې وشوه.

هغه زياته کړه چې چاودېدونکي توکي په يوه موټرسايکل کې ځاى پر ځاى شوي وو او د ريموټ کنټرول په وسيله هغه مهال ورته چاودنه ورکړل شوه چې د  ولايتي شورا رييس محمد طاووس عادل له سيمې څخه په تېرېدو کې و.

ځواک وايي چې په دې چاودنه کې د ولايتي شورا رييس له اتو نورو کسانو سره ټپي شوى او يو ساتونکى يې وژل شوى دى.

د والي د وياند په وينا، په ټپيانو کې څلور ملکي وګړي او څلور د ولايتي شورا د رييس ساتونکي دي.

د لغمان د عامې روغتيا رييس ډاکټر عطاءالله نيازي پژواک ته وويل چې ملکي روغتون ته له يادې پېښې يو جسد او ٩ ټپيان ور وړل شوي دي.

هغه د ولايتي شورا د رييس او نورو ټپيانو روغتيايي حالت د ډاډ وړ وباله.

د واحدالله په نوم د پېښې يوه عيني شاهد پژواک ته وويل چې له چاودېدونکو توکو ډک موټرسايکل د سراج بڼ تر څنګ د سړک پر غاړه درول شوى و.

د نوموړي په وينا، کله چې د ولايتي شورا رييس خپل دفتر ته روان و، نو د ريموټ په وسيله ورته چاودنه ورکړل شوه.

دى وايي چې په پېښه کې ټپي شوي ملکي کسان پلې لارويان وو.

ددې چاودنې مسووليت تر اوسه چا نه دى اخيستى.