منځپانګې ته تلل
دوشنبه ۱۶ نومبر ۲۰۲۶ · کابل ۸:۳۳ غ.م
۵° — په ټولو ولایتونو کې هوا
صاف · ↑۱۴° ↓۱°
د هوا کیفیت: منځنی
غړي

له چین څخه لومړنی اورګاډی حیرتان بند ته را ورسېد

· ۳ دقیقې لوستل · ۱۱۷ کتنې

مزارشريف (پژواک، ١٧ وږى ٩٥): له چين څخه د لومړي ځل لپاره د افغان سوداګرو مالونه په يوه ٦٨ واګونه لرونکي اورګاډي کې د منځنۍ اسيا هېوادونو له لارې د بلخ ولايت حيرتان بندر ته را ورسېد.

دغه اورګاډى د وږي په ٤مه نېټه د چين د جيانګسوى ايالت په هايمن (Haimen) ښار کې په چين کې د افغانستان سفير، د ياد هېواد د يو شمېر دولتي چارواکو او په دغه هېواد کې د يو شمېر افغان سوداګرو په شتون کې یې د افغانستان پر لور حرکت کړی و.

د بلخ د والي وياند منير فرهاد د وږي په ١٧مه پژواک خبري اژانس ته وويل چې د ٦٨ واګونونو لرونکى دغه اورګاډى تېره شپه ناوخته د حيرتان بندر ته رسېدلى دى.

هغه زياته کړه چې نن سهار د ياد اورګاډي د رسېدو او د سوداګريزو توکو د تسليمېدو مراسم نيول شوي وو چې په کې د چين سفير، د فوايد عامې وزارت، د سوداګرۍ خونې او د بلخ ولايت استازو په کې برخه اخيستې وه.

د والي وياند وايي چې له چين سره د اورګاډي له لارې سوداګريزې  اړيکو په جوړېدو سره نه يواځې بلخ، بلکې د ټول افغانستان لپاره ګټور او د اقتصادي پرمختګ لامل دى.

د فرهاد په وينا، تر اوسه افغانستان د اورګاډي له لارې يواځې  له منځنۍ اسيا او روسيې سره سوداګري کوله او هغه هم د څو مشخصو توکو، خو اوس به افغان سوداګر له چين څخه هر ډول توکي چې وغواړي واردولى شي.

د بلخ يوه سوداګر حاجي رفيق  اخندزاده پژواک اژانس ته وويل، له چين سره د اورګاډي له لارې په نښلېدو سره به افغانستان له اقتصادي اړخه ډېر پرمختګ وکړي.

هغه زياته کړه چې پخوا افغانستان له چين سره د پاکستان د کراچۍ بندر له لارې سوداګريزې اړيکې لرلې چې له امله به يې افغان سوداګر له ډېرو ستونزو سره مخ وو.

د نوموړي په وينا، لومړۍ به مالونه له کښتيو د کراچۍ په بندر کې تشېدل بيا هلته به څو ورځې پراته وو، پاکستان به کله د سياسي فشار له امله ستونزې پيدا کړې، کله به په لارو کې ستونزې وې.

اخندزاده وايي، خو اوس افغان سوداګر د اورګاډي له لارې له چين سره نېغ په نېغه ونښلول شو او د کراچۍ بندر له کړاو څخه خلاص شول.

هغه زياتوي چې له دې وروسته به د افغانستان په مارکېټونو کې توکي پرېمانه او بيې به يې هم ټيټې شي او نېغ په نېغه به يې ګټه عامو خلکو ته ورسېږي.

د افغانستان او چين تر منځ د اورګاډي دغه ليکه چې د Sino Afghan Special Railway Transportation تر نامه لاندې جوړې شوې ده.

په چين کې د افغانستان سفير جانان موسى زى وايي، دغه پټلۍ چې د "يو کمربند يوه لاره" پروګرام په چوکاټ کې په بيجينګ کې د افغانستان سفارت په هلو ځلو رامنځته شوې، ټاکل شوې په مياشت کې دوه ځلې د ٤٥ فوټه په حجم او ٢٩ ټڼه وزن او د ٤٠ فوټه او ٢٦ ټنو په وزن د افغان سوداګرو کانټينر د چين د هايمن ښار د اډې له پيل څخه افغانستان ته د قزاقستان او ازبکستان هېوادونو له لارې د بلخ ولايت تر حيرتانو بندر پورې ولېږدوي .

د نوموړي په وينا، دغه راز له دغه لوري څخه به افغاني صادرات لکه د مرمرو ډبرې، زعفران، وچې ميوې او د افغانستان نور صادراتي توکي چين ته راولېږدوي.

افغانستان او چين له پخوا زمانو راهيسې د ورېښمو له لارې له يو بل سره سوداګريزې اړيکې درلودې او افغانستان د سوداګريزې لويې لارې او د سيمې د څلورلارې په توګه؛ د سيمې د تړلو په برخه کې مهم رول درلود.

غړي

You need to subscribe to view the full article. Please login or register a new account.

اړوند خبرونه

ټول سوداګري او اقتصاد