په لغمان کې لسګونه ميله وسلې ډاياګ ته وسپارل شوې

مهترلام (پژواک، ٢٦ لړم ٩٥): د لغمان ولايت امنيتي ارګانونو ٣٣ ميله سپکې او درنې وسلې ډاياګ پروګرام ته وسپارلې.

د لغمان والي عبدالجبار نعيمي ډاياک ته د وسلو د سپارلو په مراسمو کې وويل چې په دغو وسلو کې ۸ کلاشينکوفونه، ۲۰ تومانچې، يو میل راکټ، ۹ ميله پخوانۍ وسلې او ۱۳۵۰ بېلابېل مهمات او مرمۍ شامل دي.

هغه زياته کړه چې دا وسلې او مهمات د ملي اردو او ملي پوليسو له خوا د دغه ولايت په ځینو سيمو کې د چاڼيزو عملياتو پر مهال نيول شوي دي.

نعيمي د دې ډول وسلو نيول او ډاياک پروګرام ته سپارل د سولې بهير د چټکوالي او د امنيت په ټینګښت کې مهم وبلل او په دې برخه کې يې د امنیتي ځواکونو له هڅو او قربانیو د ستاینې تر څنګ ټولو امنیتي ادارو ته دنده وسپارله چې د ناقانونه وسله والو مخه ونیسي.

په دغه ولايت کې د ٢٠١ سېلاب قول اردو د لومړۍ پلې لوا قوماندان بريد جنرال نورالله قادري او امنيه قوماندان مطيع الله صافي وويل، دوى هڅې کوي چې د لغمان په مرکز او ولسواليو کې عامه نظم تامين او د مخالفينو د شومو کړنو مخنيوي وکړي.

د لغمان د والي وياند سرحدي ځواک پژواک اژانس ته وويل چې په دغه ولايت کې هم تر دې مخکې لسګونه ميله وسلې ډاياګ ته سپارل شوې، خو کره شمېر يې ونه ښود.