محمودراقي (پژواک، ١٠ غويى ٩٦): د کاپيسا ولايت په تګاب ولسوالۍ کې د افغان ځواکونو د هوايي بريد له امله ١١ سيمه ييزو پوليسو ته مرګ ژوبله اوښتې ده.
د کاپیسا د والي وياند قیس قادري د غويي په ١٠مه پژواک خبري اژانس ته وويل چې تېره شپه د تګاب ولسوالۍ د احمدزيو د فيروزخېلو په سيمه کې د کومانډو ځواکونو په بمبار کې دوه سيمه ييز پوليس وژل شوي او ۹ نور ټپیان شوي دي.
د نوموړي په وینا، دا پېښه تېره شپه شاوخوا دوولس بجې رامنځته شوې او د بمبار موخه وسله وال مخالفين وو خو تر څنګ يې د سيمه ييزو پوليسو پوستې هم وه.
قادري وايي، ټپيان د تګاب روغتون ته وړل شوي وو، خو وروسته يې مرکزي روغتون ته وړي او وضعيت يې ښه ښودل شوى.
د تګاب يوه اوسېدونکي خليل الله هم تاييدوي چې تېره شپه د احمدزیو په سیمه کې لومړی وسله والو مخالفینو ډزې کړې وې، وروسته جګړه وشوه او په بمبار کې د سیمه ییزو پولیسو ته مرګ ژوبله اوښتې ده.
د يادونې ده، تېره ورځ په اروزګان ولايت کې افغان ځواکونو پر خپلو سرتېرو بمبار کړى و او شپږو تنو ته يې مرګ ژوبله اړولې وه.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن