د هلمند په سنګین کې وسله والو ته مرګ ژوبله اوښتې

لښکرګاه (پژواک، ۷ غبرګولی ۹۶): د هلمند امنيتي چارواکي وايي چې په سنګين ولسوالۍ کې اوه طالبان وژل شوي او شپږ نور ټپيان دي.

په هلمند کې د ٢١٥ ميوند قول اردو مطبوعاتي مسوول ډګرمن محمدرسول ځاځي د غبرګولي په ٧مه پژواک خبري اژانس ته وويل چې تېره شپه وسله والو طالبانو په سنګين ولسوالۍ کې د امنيتي ځواکونو پر پوستو ډله ييز بريدونه کړي دي.

هغه وايي چې د امنيتي ځواکونو په ځوابي ډزو کې ٧ طالبان وژل شوي او شپږ نور ټپيان دي خو امنيتي ځواکونو ته مرګ ژوبله نه ده اوښتې.

دغه راز ځاځي وويل چې تېره شپه کومانډو ځواکونو د ګرمسېر ولسوالۍ په دروېشان سيمه کې شپني عمليات کړي دي.

هغه وايي چې د دغو عملياتو په ترڅ کې يو پیکپ موټر،  یو موټرسايکل، ۲٠ د پرسونل ضد ماینونه او ١٥ د هاوان مرمۍ د امنيتي ځواکونو لاس ته ورغلي دي.

د ملي دفاع وزارت هم د يوې خبرپاڼې په خپرولو سره يادې پېښې تاييد کړي دي.

وسله والو طالبانو تر اوسه په دې اړه څه نه دي ويلي خو د دې ډلې وياند قاري يوسف احمدي په خپله ټويټر پاڼه کې ليکلي دي چې د هلمند په سنګين ولسوالۍ کې طالبانو د امنيتي ځواکونو يو ټانګ په ماينونو الوځولى دى.

هغه وايي چې په دې پېښه کې ګڼو سرتېرو ته مرګ ژوبله اوښتې ده.